O‘zbekistonlik Odil Ahmedov Rossiya Premyer-ligasi 18-turining ramziy terma jamoasiga kiritildi

“Football.kulichki.net” internet portali Rossiya Premyer-ligasi 18-turi yakunlariga ko‘ra turning ramziy terma jamoasini e’lon qildi. Ushbu terma jamoa tarkibidan o‘zbekistonlik Odil Ahmedov ham joy oldi, deb xabar beradi “Olamsport.com”.

O‘zbekiston terma jamoasi yetakchisi o‘tgan kuni “Spartak” klubiga qarshi kechgan uchrashuvda “qizil-oqlar” darvozasini ishg‘ol qilgan edi.

18-turning ramziy terma jamoasi: Vladimir Gabulov (“Dinamo”) – Mario Fernandes (SSKA), Vedran Chorluka (“Lokomotiv”), Esyekel Garay (“Zenit”), Domeniko Krishito (“Zenit”) – Aleksandr Ryazansev (“Zenit”), Odil Ahmedov (“Krasnodar”), Maurisio Pereyra (“Krasnodar”) – Ari (“Krasnodar”), Salomon Rondon (“Zenit”), Ahmad Musa (SSKA).

Yarim himoyachi: Odil Ahmedov (“Krasnodar”).

“Ahmedov ‘Krasnodar’ klubi markazini sement kabi qotirib qo‘ygan. Jamoadagi boshqa yulduzlardan farqli ravishda u ham hujumda, ham himoyada birdek o‘ynay oladi. O‘zbekistonlik legionerning eng kuchli jihati shundaki, u tayanch yarim himoya chizig‘ida Rossiya Premyer-ligasidagi eng kuchli futbolchilardan biridir. Eng muhimi, Odil juda ham sodda yigit”, – deyiladi Ahmedovga berilgan ta’rifda.