Samarqand viloyatidagi savdo do‘konidan 6 ta televizor va 11 ta tyuner o‘g‘irlab ketildi

Samarqand viloyati Kattaqo‘rg‘on shahar IIBga xususiy tadbirkor ariza bilan murojaat qildi, deb xabar beradi Ichki ishlar vazirligining axborot xizmati.

Qayd etilishicha, noma’lum shaxslar tadbirkorning shahar hududida joylashgan savdo do‘koni eshigini buzib kirib, 6 dona televizor, 11 dona tyuner va 4 dona DVD pleyerni o‘g‘irlab ketgan. Ushbu holat bo‘yicha jinoyat ishi qo‘zg‘atilgan.

Ichki ishlar xodimlari tomonidan olib borilgan tezkor chora-tadbirlar natijasida o‘g‘irlikni shu shaharda yashovchi uch nafar shaxs sodir etganligi aniqlandi va ular qo‘lga olindi. Hozirda tergov harakatlari olib borilmoqda.