Sergey Lushchan: “Rashidovdan boshqa futbolchilar ham o‘zlarini ko‘rsatishi mumkin”
Osiyo chempionlar ligasining 2-turidan o‘rin olgan “Bunyodkor” va “Persepolis” jamoalari o‘rtasidagi o‘yindan oldin matbuot anjumani o‘tkazildi. Unda dastlab mezbonlar bosh murabbiyi Sergey Lushchan va himoyachi Artyom Filiposyan ishtirok etdi. Bu haqda “Stadion.uz” xabar bermoqda.
Lushchan: Ertangi o‘yin og‘ir o‘tadi. Biz hali bunday raqib bilan o‘ynamagandik. Ularning har bir chizig‘i kuchli. Ularning safida tajribali futbolchilar ko‘p. Raqib tarkibida jangga chanqoq futbolchilar ko‘p. Ertaga chiroyli o‘yin emas, ko‘proq jang bo‘lsa kerak. Jamoaning barcha futbolchilari o‘yinning oxirigacha kurash olib boradi. Yutqazayotgan bo‘lsa ham, o‘lib qolayotgan bo‘lsa ham, jamoa oxirigacha kurashadi. Bu tomonlama, raqibimiz biz uchun biroz noqulay. Masalan, “Al-Jazira” o‘zi ham o‘ynardi, raqibga ham o‘ynash imkoniyatini berardi. “Persepolis” esa unday emas. Nazarimda, yakkakurashlarda kim ko‘proq yutib chiqsa, o‘sha g‘alaba qozonadi. Bizning vazifamiz - yaratiladigan har bir imkoniyatdan foydalanish.
Filiposyan: Chempionlar ligasida har bir o‘yin biz uchun og‘ir o‘tadi. Shu sababli har bir o‘yinga 100 foiz tayyor bo‘lishimiz kerak.
Savol: Artyom, avvalgi “Bunyodkor” bilan hozirgisining farqi nimada?
Javob: Hozir tarkibimizda yoshlar ko‘p. Asosiy o‘zgarish sifatida hozir qarshi hujumga tez o‘tayotganimizni aytib o‘tishim mumkin.
Savol: “An-Nasr”ga karshi oyinda asosiy urg‘u Sardor Rashidovga qaratildi. Tarkibda Rashidovdan tashqari o‘yin tizginini o‘zgartirib yuboradigan futbolchilar bormi?
Javob: Tashqaridan qaraganda, siz haqsiz. Jamoa qarshi hujumda o‘ynayotganda Rashidovning tezkorligi evaziga undan unumli foydalanishga harakat qilamiz. Bunday futbolchidan, albatta, foydalanishimiz kerak. Ammo tarkibimizda Rashidovdan boshqa futbolchilar ham o‘zlarini ko‘rsatishi mumkin. Masalan, Shodiyev muhim gol urdi. Shunchaki, Rashidovning imkoniyatidan foydalanmaslik, g‘alati bo‘lardi. Raqib Sardorni yopishga urinsin, shunda boshqa o‘yinchilarimizda imkoniyat yuzaga keladi.
Savol: Saudiya Arabistonida “An-Nasr”ga qarshi uchrashuvda jamoa raqibiga qaraganda kamroq zarba berdi. Ertaga “Bunyodkor” o‘z maydonida o‘ynaydi va bu o‘yinda ko‘proq zarba ko‘rishimiz mumkinmi?
Javob: Ha, bu bizning kamchiligimizdan biri. O‘yin paytida o‘yinchining o‘zi futbolchiga nima qilish kerakligini aytadi. Zarba beradigan vaziyat bo‘lsa, albatta zarba beriladi. “An-Nasr” hujumkor o‘ynaydigan jamoa. Saudiya Arabistonida durang ham biz uchun yaxshi natija bo‘ldi. Ertaga ko‘proq zarba berishga va gol urishga harakat qilamiz.
Savol: “Murabbiylik omadi” degan tushunchaga ishonasizmi?
Javob: Kim ko‘proq ishlasa, omad o‘shaning tomonida bo‘ladi. Biz sutkasigia 24 soat ishlayapmiz. Agar Xudo bersa, yutamiz. Yutqazsak, demak, nimanidir noto‘g‘ri bajarganmiz. Men “murabbiylik omadi” degan narsani tushunmayman.
Savol: Darvozabon Akbar To‘rayev “An-Nasr”ga qarshi o‘yinda ko‘p xato qilgandek ko‘rindi...
Javob: Hozirda oyoq bilan zo‘r o‘ynaydigan darvozabon yo‘q. Sizni ishontirib ayta olamanki, 1-2 yildan keyin Akbar To‘rayev O‘zbekistonning, O‘zbekiston terma jamoasining birinchi raqamli darvozaboniga aylanadi. Hozirda bunchalik iqtidorli posbonni men O‘zbekistonda ko‘rmayapman. U keyinchalik bemalol Yevropa klublarida ham o‘ynab keta oladi. Men bunga ishonaman.
