Осиё чемпионлар лигасининг 2-туридан ўрин олган «Бунёдкор» ва «Персеполис» жамоалари ўртасидаги ўйиндан олдин матбуот анжумани ўтказилди. Унда дастлаб мезбонлар бош мураббийи Сергей Лушчан ва ҳимоячи Артём Филипосян иштирок этди. Бу ҳақда «Stadion.uz» хабар бермоқда.
Лушчан: Эртанги ўйин оғир ўтади. Биз ҳали бундай рақиб билан ўйнамагандик. Уларнинг ҳар бир чизиғи кучли. Уларнинг сафида тажрибали футболчилар кўп. Рақиб таркибида жангга чанқоқ футболчилар кўп. Эртага чиройли ўйин эмас, кўпроқ жанг бўлса керак. Жамоанинг барча футболчилари ўйиннинг охиригача кураш олиб боради. Ютқазаётган бўлса ҳам, ўлиб қолаётган бўлса ҳам, жамоа охиригача курашади. Бу томонлама, рақибимиз биз учун бироз ноқулай. Масалан, «Ал-Жазира» ўзи ҳам ўйнарди, рақибга ҳам ўйнаш имкониятини берарди. «Персеполис» эса ундай эмас. Назаримда, яккакурашларда ким кўпроқ ютиб чиқса, ўша ғалаба қозонади. Бизнинг вазифамиз - яратиладиган ҳар бир имкониятдан фойдаланиш.
Филипосян: Чемпионлар лигасида ҳар бир ўйин биз учун оғир ўтади. Шу сабабли ҳар бир ўйинга 100 фоиз тайёр бўлишимиз керак.
Савол: Артём, аввалги «Бунёдкор» билан ҳозиргисининг фарқи нимада?
Жавоб: Ҳозир таркибимизда ёшлар кўп. Асосий ўзгариш сифатида ҳозир қарши ҳужумга тез ўтаётганимизни айтиб ўтишим мумкин.
Савол: «Ан-Наср»га карши ойинда асосий урғу Сардор Рашидовга қаратилди. Таркибда Рашидовдан ташқари ўйин тизгинини ўзгартириб юборадиган футболчилар борми?
Жавоб: Ташқаридан қараганда, сиз ҳақсиз. Жамоа қарши ҳужумда ўйнаётганда Рашидовнинг тезкорлиги эвазига ундан унумли фойдаланишга ҳаракат қиламиз. Бундай футболчидан, албатта, фойдаланишимиз керак. Аммо таркибимизда Рашидовдан бошқа футболчилар ҳам ўзларини кўрсатиши мумкин. Масалан, Шодиев муҳим гол урди. Шунчаки, Рашидовнинг имкониятидан фойдаланмаслик, ғалати бўларди. Рақиб Сардорни ёпишга уринсин, шунда бошқа ўйинчиларимизда имконият юзага келади.
Савол: Саудия Арабистонида «Ан-Наср»га қарши учрашувда жамоа рақибига қараганда камроқ зарба берди. Эртага «Бунёдкор» ўз майдонида ўйнайди ва бу ўйинда кўпроқ зарба кўришимиз мумкинми?
Жавоб: Ҳа, бу бизнинг камчилигимиздан бири. Ўйин пайтида ўйинчининг ўзи футболчига нима қилиш кераклигини айтади. Зарба берадиган вазият бўлса, албатта зарба берилади. «Ан-Наср» ҳужумкор ўйнайдиган жамоа. Саудия Арабистонида дуранг ҳам биз учун яхши натижа бўлди. Эртага кўпроқ зарба беришга ва гол уришга ҳаракат қиламиз.
Савол: «Мураббийлик омади» деган тушунчага ишонасизми?
Жавоб: Ким кўпроқ ишласа, омад ўшанинг томонида бўлади. Биз суткасигиа 24 соат ишлаяпмиз. Агар Худо берса, ютамиз. Ютқазсак, демак, ниманидир нотўғри бажарганмиз. Мен «мураббийлик омади» деган нарсани тушунмайман.
Савол: Дарвозабон Акбар Тўраев «Ан-Наср»га қарши ўйинда кўп хато қилгандек кўринди...
Жавоб: Ҳозирда оёқ билан зўр ўйнайдиган дарвозабон йўқ. Сизни ишонтириб айта оламанки, 1-2 йилдан кейин Акбар Тўраев Ўзбекистоннинг, Ўзбекистон терма жамоасининг биринчи рақамли дарвозабонига айланади. Ҳозирда бунчалик иқтидорли посбонни мен Ўзбекистонда кўрмаяпман. У кейинчалик бемалол Европа клубларида ҳам ўйнаб кета олади. Мен бунга ишонаман.
Изоҳ (0)