Toshkentda Markaziy Osiyo futbol uyushmasi tashkil qilinadi, deya xabar bermoqda “Stadion.uz”. O‘zbekiston futbol federatsiyasi prezidenti Mirabror Usmonov Markaziy Osiyo futbol uyushmasi (Central Asian Football Association)ga prezident etib tayinlandi.
2015-yilning 9-yanvarida Avstraliyaning Melburn shahrida bo‘lib o‘tgan Osiyo Futbol Konfederatsiyasi (OFK)ning navbatdan tashqari Kongessida tashkilot ustaviga o‘zgartirishlar kiritilgan edi. Unga ko‘ra OFKga a’zo 47 ta futbol federatsiyalari 5 ta (bungacha 4 ta) geografik mintaqaga bo‘linishi belgilab qo‘yilgan va yangi Markaziy Osiyo mintaqasini tashkil qilish Kongress a’zolari tomonidan ma’qullangan edi.
OFKning ushbu islohotlari doirasida Markaziy Osiyo mintaqasi futbol federatsiyalarining mutasaddi shaxslari Quvaytda yig‘ilib, Markaziy Osiyo futbol uyushmasining qarorgohini Toshkent shahrida tashkil qilishga kelishib oldi.
OFK ustaviga kiritilgan yangi o‘zgartirishlarga ko‘ra, endilikda, Markaziy Osiyo mintaqasi uchun tashkilot Ijroiya Qo‘mitasidan 3 ta joy ajratiladi.
OFK Ustavining 7-moddasidan ko‘chirma:
OFK a’zo 47 ta futbol federatsiyalari 5 ta geografik zonaga bo‘linadi:
G‘arb: Bahrayn, Iroq, Iordaniya, Quvayt, Livan, Ummon, Falastin, Qatar, Saudiya Arabistoni, Suriya, BAA, Yaman – jami 12 ta
Janub: Bangladesh, Butan, Hindiston, Maldiv orollari, Nepal, Pokiston, Shri Lanka – jami 7 ta
Markaziy: Afg‘oniston, Eron, Qirg‘iziston, Tojikiston, Turkmaniston, O‘ZBEKISTON – jami 6 ta
ASEAN: Avstraliya, Bruney, Kambodja, Sharqiy Timor, Indoneziya, Laos, Malayziya, Myanma, Filippin orollari, Singapur, Tailand, Vetnam – jami 12 ta
Sharq: Xitoy, Xitoy Taypeyi, Shimoliy Koreya, Guam, Gonkong, Yaponiya, Koreya, Makao, Mongoliya, Shimoliy Mariana orollari – jami 10 ta
Izoh (0)