Osiyo Chempionlar ligasi 1-turida “Nasaf” o‘z maydonida “Traktorsoziy”dan ustun keldi

Osiyo Chempionlar ligasi 1-turidan o‘rin olgan “Nasaf” va “Traktorsoziy” jamoalari o‘rtasida uchrashuv o‘z nihoyasiga yetdi, deb xabar beradi “Stadion.uz”.

Birinchi bo‘limni qarshilik futbolchilar juda sust o‘tkazdi. Jamoa a’zolari o‘zaro bir-birini tushunib o‘ynashda ancha muammolarga duch keldi. Raqib ham u qadar faollik ko‘rsatmay, asosan, ikkinchi raqamda o‘ynab, qarshi hujumda “Nasaf” futbolchilarini jazolashga harakat qildi. Aytish mumkinki, eronliklarning birinchi bo‘lim uchun tanlagan taktiklari to‘liq o‘zini oqladi.

31-daqiqada o‘ng qanotdan jarima maydonchasi ichiga yetkazib berilgan to‘pga Edinyo boshi bilan kuchsiz zarba berdi. Ammo “Nasaf” posboni bu vaziyatda bir oz oldinga chiqib ketgani uchun bu zarbani qaytara olmadi. Hisob ochilganidan keyin qarshiliklar bor e’tiborni hujumga qarata boshladi. Ammo ularning harakatlari birinchi bo‘limda samara bergani yo‘q.

Ikkinchi bo‘limni esa “ajdarlar” tamoman boshqacha boshladi. Tanaffusda Ro‘ziqul Berdiyevning o‘z shogirdlariga bergan ko‘rsatmalari tezda o‘z natijasini ko‘rsatdi. Ilhom Shomurodov jarima maydonchasi chizig‘idan ajoyib zarba yo‘llab, hisobni ochdi. Goldan ruhlangan “Nasaf” futbolchilari tezda hisobda oldinga chiqib olishga muvaffaq bo‘ldi. Artur Gevorkyan o‘ziga nisbatan ishlatilgan qo‘pollikdan keyin jarima zarbasidan to‘pni havolatib oshirib berdi. Hammadan baland sakragan Hamza Karimov boshi bilan ajoyib zarba yo‘llab, hisobni 2:1 ko‘rinishiga olib keldi.

“Nasaf” shundan keyin ham tinchigani yo‘q. Hujum ketidan hujum uyushtirishda davom etdi. Bu vaziyatda “Traktorsoziy” jamoasi a’zolari “Nasaf” vakillarining hujumlarini qiyinchilik bilan qaytarib turdi.

Ikkinchi bo‘limning ikkinchi yarmida raqib ham bir oz o‘ziga kelib, asta hujumlar uyushtira boshladi. Ammo bu hujumlarni “Nasaf” himoyachilari va darvozabon qaytarishga muvaffaq bo‘ldi.

Shu tariqa, “Nasaf” Osiyo Chempionlar ligasi 1-turidan o‘rin olgan uchrashuvda g‘alaba qozonib, uch ochkoni qo‘lga kiritdi.

OChL, 1-tur

“Nasaf”  – “Traktorsoziy”: 2:1

Gol: I.Shomurodov (46), H.Karimov (53) - Edinyo (31).

“Nasaf”: Eldor Suyunov, Maqsud Karimov, Ilhom Shomurodov, Roy Rok, Artur Gevorkyan, Erkin Boydullayev, Shuhrat Muhammadiyev, Hamza Karimov, Odil Hamrobekov, Farruh Sayfiyev, Oleksandr Koblash.

“Traktorsoziy”: Hamid Lak, Hamid Gordaniy, Xolid Shafiy, Mirxan Xoshimiy, Mehdi Kianiy, Shahin Sag‘ibiy, Andranik Teymuryan, Ahmad Kamdar, Farshad Ahmadzoda, Edinyo, Fardin Abidiniy.