Toshkent viloyatidagi ikki korxona 10 ta yangi Isuzu avtobusini xarid qildi, deb xabar bermoqda O‘zbekiston avtomobil va daryo transporti agentligi axborot xizmati.
Zangiota tumanidagi “Kamolot sari Trans” mas’uliyati cheklangan jamiyati 2 ta va Chirchiq shahridagi Mega Star Lux mas’uliyati cheklangan jamiyati 8 ta Isuzu’ni lizing asosida xarid qildi.
“Kamolot sari Trans” MChJ 14 o‘rindiqli va 37 nafar yo‘lovchiga mo‘ljallagan avtobuslarni shahar atrofida yo‘lovchi tashish huquqini beruvchi litsenziya varaqalari bilan ta’minlab, ayni paytda VH-453 “Ittifoq” QFY – “Chorsu” savdo markazi AShB yo‘nalishida aholiga xizmat ko‘rsatmoqda. Avtobuslar “O‘zavtosanoat-lizing” kompaniyasi orqali jami 118 million so‘mlik lizing shartnomasi asosida sotib olindi.
8 ta avtobus xarid qilish bo‘yicha 432 million so‘mlik lizing shartnomasini imzolagan Mega Star Lux MChJ yangi transport vositalaridan hozircha faqat buyurtma asosida xizmat ko‘rsatishda foydalanmoqda.
Yangi avtobuslar xarid qilinishi munosabati bilan korxonalarda o‘ndan ortiq ish o‘rni yaratildi.
2015-yil viloyatdagi 9 ta tashuvchi korxona jami 62 dona Isuzu avtobusi xarid qilishni rejalashtirgan. Xususan, Qibray tumanidagi “Qibray Transport Servis” ShK 20 ta, Bo‘ka tumanidagi “Bo’ka Yo‘lovchi Trans Servis” MChJ 10 ta, Olmaliq shahridagi “Taksi Aktiv” MChJ, “Sprint Tim Transport” MChJ, Chirchiq shahridagi “Shodlik Lizingtrans” MChJ, “2-sonli Chirchiq shahar avtokorxonasi” MChJ hamda “Chirchiq Imkon Plyus” MChJ 5 tadan, Bekobod shahridagi “Bekobod ATS” MChJ 4 ta va Parkent tumanidagi “Parkent ATS” MChJ 3 ta avtobus xarid qiladi.
Izoh (0)