“Bunyodkor” murabbiyi: “Raqibni tartibli o‘yin orqali mag‘lubiyatga uchratishga harakat qilamiz”

“Bunyodkor” – “Al-Jazira” jamoalari o‘rtasidagi uchrashuv oldidan bo‘lib o‘tgan matbuot anjumanining ikkinchi qismida Sergey Lushan qatnashdi, deb xabar beradi “Uff.uz”.

“Ertaga mavsumdagi ilk rasmiy o‘yinimizni o‘tkazamiz. Umid qilamanki, muxlislar qiziqarli bahs guvohi bo‘ladi”, – deya gap boshladi “Bunyodkor” murabbiyi.

Akmal Shorahmedov: Ertangi o‘yin juda muhim. Nima qilib bo‘lsa ham Chempionlar ligasi guruh bosqichiga chiqishimiz kerak.

Savol: Noqulay ob-havo halaqit qilmaydimi?

Javob: Ob-havo ikki jamoa uchun ham bir xil. Bor e’tiborimizni maydondagi o‘yinga qaratamiz. Avvaldan o‘ylab qo‘ygan rejalarimiz bor.

Savol: Akmal Shorahmedovga savol. Qaysi futbolchilarni o‘rganib chiqdingiz?

Javob: Men himoyachi bo‘lganim uchun ko‘proq hujumchilarni o‘rganib chiqdik. Ali Al-Mabhut, Vuchinich kabi hujumchilar bor. Ularna yaxshilab qo‘riqlashga harakat qilamiz.

Savol: Statistikaga murojaat qiladigan bo‘lsak, o‘tish bosqichida hech qaysi o‘zbekistonlik klub muvaffaqiyatli ishtirok etmagan ekan...

Javob: Biz bunga barham berishga harakat qilamiz.

Savol: Ertangi raqib juda ham kuchli. Bu futbolchilarga ortiqcha bosim yuklamaydimi?

Javob: Asosiy muammo raqibning kuchliligida emas, balki ertangi o‘yin biz uchun birinchi rasmiy uchrashuv ekanligidadir. Futbolchilar bunday o‘yinlarni sog‘inib qolgan. Umid qilamanki, ertaga ko‘plab muxlislar tashrif buyurib, bizni qo‘llab-quvvatlaydi.

Savol: Kuchli jamoaga qarshi qanday taktika tanlamoqchisiz?

Javob: Kuchli raqibga qarshi tartibli o‘yin orqali harakat qilib, g‘alaba qozonmoqchimiz.

Savol: Maydonning ahvolidan qoniqish hosil qildingizmi?

Javob: Maydon ajoyib holatda.