Samsung o‘z televizorlari josuslik qilmasligini ma’lum qildi

Samsung kompaniyasi o‘zining Smart TV aqlli televizorlari o‘z egalarining suhbatlarini eshitishi haqidagi xabarlarni rasman rad etdi, deb xabar bermoqda “Rossiyskaya gazeta”.

Avvalroq, kompaniyaning o‘zi aqlli televizorlar ovoz tanish funksiyasi yoqilganda shaxsiy ma’lumotlarni ham yozib olib, uchinchi tashkilotlarga jo‘natishi mumkinlgini ma’lum qilgan edi. Shundan keyin televizorning josusligi haqida xabarlar tarqalgan.

Samsung’ning aniqlik kiritishicha, televizor va pultga o‘rnatilgan mikrofonlar faqatgina ovozli boshqaruvni ta’minlash uchun ishlatiladi, buni takomillashtirish maqsadida buyruqlar yozuvi kompaniyaga jo‘natilishi mumkin. Ushbu funksiyani istalgan vaqtda o‘chirib qo‘yish mumkin.