Rossiya TIV rahbari yadro muammosi hal qilinsa Eron ShHTga qabul qilinishi mumkinligini ma’lum qildi

Rossiya tashqi ishlar vaziri Sergey Lavrov Eronning Shanxay hamkorlik tashkilotiga a’zo bo‘lishi masalasi ko‘rib chiqilishi mumkinligini ma’lum qildi, deb xabar bermoqda “Interfaks”.

“Eron ShHTga a’zo bo‘lishni so‘rab murojaat qilgan. Menimcha bu bemalol yuz berishi mumkin, ayniqsa Eron yadro dasturi bilan bog‘liq jarayon hal etilgan taqdirda. Zotan, ShHTga a’zo bo‘lish uchun nomzod davlatga BMT tomonidan hech qanday sanksiya amalda bo‘lmasligi lozim”, − dedi Lavrov.

Shuningdek, u ShHTning to‘laqonli a’zoligiga qabul qilinish uchun birinchi navbatda Hindiston va Pokistonning arizalari ko‘rib chiqilishini ma’lum qildi. Qayd etilishicha, buning uchun tashkilot a’zolari o‘rtasidagi konsensus yetarli bo‘ladi.