Farg‘ona viloyatida 49 ta yo‘nalish tender tanlovlari orqali joylashtirildi

2014-yilda Farg‘ona viloyatida 49 ta yo‘nalish tender tanlovlari orqali joylashtirildi, 3 ta yangi yo‘nalishda muntazam qatnov yo‘lga qo‘yildi. Bu haqda O‘zbekiston avtomobil va daryo transporti agentligi axborot xizmati xabar bermoqda.

O‘tgan yil mobaynida Farg‘ona viloyati yo‘lovchi tashish transporti ishini boshqarish komissiyasi tomonidan o‘tkazilgan 8 ta tender tanlovida jami 49 ta yo‘nalish joylashtirildi. Shundan 18 tasi avtobus va 31 tasi yo‘nalishli taksi yo‘nalishidir.

Qolaversa, tuman hokimliklari bilan birgalikda, aholining avtotransport xizmatiga ehtiyojidan kelib chiqqan holda yangi yo‘nalishlar ochilmoqda. 2014-yilda shu asosda 3 ta yangi yo‘nalish tashkil qilinib, tender tanlovlari orqali joylashtirildi. Jumladan, Buvayda — Yangiqo‘rg‘on yo‘nalishida “Buvayda transport-texnika” MChJning 4 ta avtobusi, Qo‘qon — Abdusamad yo‘nalishli taksi yo‘nalishida “Valley Melio” MChJga qarashli 10 ta Damas avtomobili hamda “Ismoil Trans” MChJga biriktirilgan Bag‘dod — Tuvadoq yo‘nalishli taksi yo‘nalishida 5 ta Damas avtomobillari muntazam qatnab, aholiga sifatli xizmat ko‘rsatilmoqda.