Olimlar o‘lim xavfi tug‘ilgan kunlarda yuqori bo‘lishini aniqladi

Amerikalik olimlar o‘z tug‘ilgan kunida vafot etish xavfi boshqa kunlarga nisbatan ancha yuqori ekanligini aniqladi, deya xabar bermoqda Daily Mail.

Ularning fikricha, tug‘ilgan kunni nishonlash uchun o‘tkaziladigan ziyofatlardagi baxtsiz hodisalar, shuningdek o‘z joniga qasd qilishlar o‘lim xavfini oshiradi. Baxtsiz hodisalarga spirtli ichimliklar va narkotiklarni suiiste’mol qilish sabab bo‘lsa, depressiya o‘z joniga qasd qilish holatlarini keltirib chiqaradi.

Olimlar so‘zlariga ko‘ra, tug‘ilgan kunida odamlar o‘z odatiy rejimidan chetga chiqib, o‘zlarini boshqacha tutishga moyil bo‘ladi.

Mutaxassislar 14 yoshdan yuqori bo‘lgan 25 million kishining o‘limi haqidagi ma’lumotlarni o‘rganib chiqqach, bunday xulosaga keldi. Ularning 73 266 nafari o‘z tug‘ilgan kunida vafot etgani ma’lum bo‘ldi.

Bir kunlik o‘rtacha o‘lim soni 68 493 kishini tashkil etishini hisobga olgan holda, ushbu ko‘rsatkich ekspertlar kutganidan deyarli 7 foizga yuqoridir.