O‘zbekistonlik shayx Muhammad Sodiq Muhammad Yusufga Rossiya musulmonlarining “Al-Faxr” ordeni topshirildi

Rossiya Federatsiyasi Musulmonlar diniy idorasi hamda Rossiya muftiylar kengashining raisi shayx Ravil G‘aynutdinning qaroriga muvofiq, “An’anaviy Islomni saqlash, yoyish va uni targ‘ib qilish ishiga qo‘shgan salmoqli hissasi, musulmon ummati manfaatlariga qilayotgan xizmati uchun” o‘zbekistonlik fazilatli shayx Muhammad Sodiq Muhammad Yusuf hazratlari “Al-Faxr” ordeni bilan taqdirlandi, deya xabar beradi “Kun” “Info.islom.uz” axborotiga tayanib.

Mukofot shu yil 10-dekabr sanasida o‘ninchi Xalqaro musulmonlar forumi ishining birinchi kuni Rossiya musulmonlarining diniy yetakchisi, muftiy Ravil G‘aynutdin tomonidan topshirildi. Shu kuni Musulmon ulamolarining xalqaro ittifoqi (Doha, Qatar) bosh kotibi shayx Ali Muhiddin al-Qoradog‘iyga ham “Al-Faxr” ordeni topshirildi.

Taqdirlash marosimidan so‘ng, qator nufuzli xalqaro tashkilotlarning a’zosi shayx Muhammad Sodiq Muhammad Yusuf hazratlari shayx Ravil G‘aynutdinga o‘z minnatdorligini izhor etib, amalga oshirayotgan ilmiy va diniy faoliyatlarini ummat va butun insoniyat uchun bundan buyon ham davom ettirishga tayyor ekanligini ma’lum qildi.