Россия Федерацияси Мусулмонлар диний идораси ҳамда Россия муфтийлар кенгашининг раиси шайх Равил Ғайнутдиннинг қарорига мувофиқ, «Анъанавий Исломни сақлаш, ёйиш ва уни тарғиб қилиш ишига қўшган салмоқли ҳиссаси, мусулмон уммати манфаатларига қилаётган хизмати учун» ўзбекистонлик фазилатли шайх Муҳаммад Содиқ Муҳаммад Юсуф ҳазратлари «Ал-Фахр» ордени билан тақдирланди, дея хабар беради «Кун» «Info.islom.uz» ахборотига таяниб.
Мукофот шу йил 10 декабрь санасида ўнинчи Халқаро мусулмонлар форуми ишининг биринчи куни Россия мусулмонларининг диний етакчиси, муфтий Равил Ғайнутдин томонидан топширилди. Шу куни Мусулмон уламоларининг халқаро иттифоқи (Доҳа, Қатар) бош котиби шайх Али Муҳиддин ал-Қорадоғийга ҳам «Ал-Фахр» ордени топширилди.
Тақдирлаш маросимидан сўнг, қатор нуфузли халқаро ташкилотларнинг аъзоси шайх Муҳаммад Содиқ Муҳаммад Юсуф ҳазратлари шайх Равил Ғайнутдинга ўз миннатдорлигини изҳор этиб, амалга ошираётган илмий ва диний фаолиятларини уммат ва бутун инсоният учун бундан буён ҳам давом эттиришга тайёр эканлигини маълум қилди.
Изоҳ (0)