Ўзбекистонда талабалар билимини баҳолаш олий таълим муассасалари рейтингини тузиш доирасида ташкил этилади, дея хабар бермоқда Давлат тест маркази расмий сайти.
Жорий йилда Ўзбекистон Республикаси Вазирлар Маҳкамасининг 2012 йил 29 декабрдаги «Республика олий таълим муассасалари рейтингини баҳолаш тизимини жорий этиш чора-тадбирлари тўғрисида»ги 371-сонли қарори ижроси юзасидан жами 69 та олий таълим муассасаси (шу жумладан 11 та ҳудудий филиаллар) рейтинг жараёнида иштирок этмоқда.
Республикамиз олий таълим муассасалари юқори босқич талабаларининг мутахассислик фанлари бўйича билимларини ва фанларни ўзлаштириш даражасини аниқлаш мақсадида ҳар бир олий таълим муассасасидан 3 тадан асосий таянч таълим йўналишлари танлаб олиниб, уларда таҳсил олаётган жами 17228 нафар битирувчилар тўғрисида маълумотлар базаси шакллантирилди.
Тест синовларига танланган таълим йўналишларидан битирувчиларнинг ўртача 31,6 фоизи (5443 нафари) жалб қилинмоқда. Бунинг учун республика бўйича жами 264 та академик гуруҳлар танлаб олинди.
Тест синовларини ўтказиш бўйича Олий ва ўрта махсус таълим вазирлиги билан Давлат тест маркази ўртасида қўшма қарор қабул қилинди. Тест синовлари жараёнида Давлат тест маркази ходимлари билан биргаликда вазирлик вакиллари ва жамоатчи экспертлар кузатувчи сифатида иштирок этади.
Тестлар ҳудудий ОТМларда 2—6 декабрь кунлари, пойтахтда эса 9—13 декабрь кунлари ўтказилади. Уларнинг натижалари бўйича талабалар билими ва педагоглар малакаси баҳоланади.