Sog‘lom bola yilida ish o‘rinlari tashkil etish va aholi bandligini ta’minlash dasturi doirasida Qoraqalpog‘iston Respublikasida 49 827 yangi ish o‘rni yaratish rejalashtirilgan, deb xabar bermoqda O‘zbekiston Milliy axborot agentligi.
“Ishlab chiqilgan maxsus dastur asosida joriy yilning yanvar — oktabr oylarida 43 mingdan ziyod aholi ish bilan ta’minlandi, — dedi Qoraqalpog‘iston Respublikasi mehnat va aholini ijtimoiy muhofaza qilish vaziri Umar Soburov. — Jumladan, ayollar uchun 18 ming, yoshlar uchun 17 mingdan ortiq ish o‘rni tashkil etildi. Yangi ishlab chiqarish obyektlarini ishga tushirish, ishlab turgan korxonalarni modernizatsiya qilish va kengaytirish hisobidan 671, kichik korxonalar va mikrofirmalar tashkil etish evaziga 17 779 yangi ish o‘rni yaratildi”.
Kichik biznes va xususiy tadbirkorlik subyektlari har tomonlama qo‘llab-quvvatlanib, keng imkoniyat va imtiyozlar yaratilayotgani aholi bandligini ta’minlashda muhim omil bo‘lmoqda. Shu yilning o‘tgan davrida mazkur yo‘nalishda 2191 yangi ish o‘rni yaratilgan. Kasanachilikning barcha shakllarini tashkil etish hisobidan 8300 dan ziyod aholi bandligi ta’minlangan. Chekka qishloqlarda yashovchi aholini ish bilan ta’minlashda fermer xo‘jaliklarini rivojlantirish, ularni ko‘p tarmoqli xo‘jaliklarga aylantirish juda qo‘l kelmoqda. Bu borada olib borilgan ishlar natijasida 9800 dan ziyod aholi doimiy ish o‘rniga ega bo‘ldi.
Yoshlar, ayniqsa, kasb-hunar kolleji bitiruvchilarining bandligini ta’minlashga alohida e’tibor qaratilmoqda. 2013—2014-o‘quv yilida kasb-hunar kollejini bitirgan 24 mingdan ziyod yigit-qizning bandligi to‘liq ta’minlangan.
Shu yilning o‘tgan davrida tashkil etilgan mehnat yarmarkalarida 2685 korxona va tashkilotning 8596 bo‘sh ish o‘rni taklif etildi. Natijada 4236 nafar fuqaroga ishga kirish uchun yo‘llanma, 3750 nafariga mehnat, bandlik va ijtimoiy himoya masalalari bo‘yicha maslahatlar berildi.
Shahar va tuman bandlikka ko‘maklashish va aholini ijtimoiy muhofaza qilish markazlari yo‘llanmalari asosida ayni paytda Ustyurt gaz-kimyo majmuasi qurilishida 5 mingdan ziyod yosh mehnat qilmoqda.
Izoh (0)