Соғлом бола йилида иш ўринлари ташкил этиш ва аҳоли бандлигини таъминлаш дастури доирасида Қорақалпоғистон Республикасида 49 827 янги иш ўрни яратиш режалаштирилган, деб хабар бермоқда Ўзбекистон Миллий ахборот агентлиги.
«Ишлаб чиқилган махсус дастур асосида жорий йилнинг январь — октябрь ойларида 43 мингдан зиёд аҳоли иш билан таъминланди, — деди Қорақалпоғистон Республикаси меҳнат ва аҳолини ижтимоий муҳофаза қилиш вазири Умар Собуров. — Жумладан, аёллар учун 18 минг, ёшлар учун 17 мингдан ортиқ иш ўрни ташкил этилди. Янги ишлаб чиқариш объектларини ишга тушириш, ишлаб турган корхоналарни модернизация қилиш ва кенгайтириш ҳисобидан 671, кичик корхоналар ва микрофирмалар ташкил этиш эвазига 17 779 янги иш ўрни яратилди».
Кичик бизнес ва хусусий тадбиркорлик субъектлари ҳар томонлама қўллаб-қувватланиб, кенг имконият ва имтиёзлар яратилаётгани аҳоли бандлигини таъминлашда муҳим омил бўлмоқда. Шу йилнинг ўтган даврида мазкур йўналишда 2191 янги иш ўрни яратилган. Касаначиликнинг барча шаклларини ташкил этиш ҳисобидан 8300 дан зиёд аҳоли бандлиги таъминланган. Чекка қишлоқларда яшовчи аҳолини иш билан таъминлашда фермер хўжаликларини ривожлантириш, уларни кўп тармоқли хўжаликларга айлантириш жуда қўл келмоқда. Бу борада олиб борилган ишлар натижасида 9800 дан зиёд аҳоли доимий иш ўрнига эга бўлди.
Ёшлар, айниқса, касб-ҳунар коллежи битирувчиларининг бандлигини таъминлашга алоҳида эътибор қаратилмоқда. 2013—2014-ўқув йилида касб-ҳунар коллежини битирган 24 мингдан зиёд йигит-қизнинг бандлиги тўлиқ таъминланган.
Шу йилнинг ўтган даврида ташкил этилган меҳнат ярмаркаларида 2685 корхона ва ташкилотнинг 8596 бўш иш ўрни таклиф этилди. Натижада 4236 нафар фуқарога ишга кириш учун йўлланма, 3750 нафарига меҳнат, бандлик ва ижтимоий ҳимоя масалалари бўйича маслаҳатлар берилди.
Шаҳар ва туман бандликка кўмаклашиш ва аҳолини ижтимоий муҳофаза қилиш марказлари йўлланмалари асосида айни пайтда Устюрт газ-кимё мажмуаси қурилишида 5 мингдан зиёд ёш меҳнат қилмоқда.
Изоҳ (0)