Jahon banki guruhi “Biznesni yuritish 2014: Samaradorlik doirasidan chiqib” (Doing Business 2014: Going Beyond Efficiency) navbatdagi yillik ma’ruzasini e’lon qildi. Bu haqda Gazeta.uz xabar bermoqda.
Yangi reytingda O‘zbekiston o‘tgan yilgi 149-o‘rindan 141-o‘ringa — 8 pog‘ona yuqoriga ko‘tarildi (o‘tgan yili O‘zbekiston dastlab 146-o‘rinda bo‘lgan, biroq baholash uslubining o‘zgarishi tufayli 149-o‘ringa loyiq ko‘rilgan).
Hisob bo‘yicha 12-bo‘lgan bu yilgi “Biznesni yuritish” ma’ruzasi 189 mamlakatda 2013-yil iyunidan 2014-yil mayigacha korxonaning yaratilishi, qarz to‘lay olmaslik muammolarini yechish va tashqi iqtisodiy faoliyatni amalga oshirish kabi o‘nta yo‘nalish bo‘yicha aniqlanadi.
Ta’kidlash joiz, hisobot davrida O‘zbekistonda eng sezilarli darajada yaxshilangan soha — soliq solish sohasi bo‘lib, O‘zbekiston bu ko‘rsatkich bo‘yicha reytingda o‘tgan yilgi 179-o‘rindan 118-o‘ringa ko‘tarilgan.
Minoritar investorlar, xususiy mulkni ro‘yxatdan o‘tkazish, elektr tarmoqlariga ulanish, shartnomalar bajarilishini ta’minlash ko‘rsatkichlari bo‘yicha ham yaxshilanishlar kuzatilgan.
Aksincha, korxonalarni ro‘yxatga olish, kredit olish, qurilish uchun ruxsat olish kabi sohalarda esa yomonlashish kuzatilgan. Xalqaro savdo-sotiqni yuritish shart-sharoitlari esa o‘zgarishsiz qolgan.
Qayd etish lozim, tadbirkorlik faoliyati uchun qulay shart-sharoitlar bo‘yicha jahon reytingida ketma-ket to‘qqiz yildan buyon Singapur yetakchilik qilmoqda. Bundan tashqari, Xitoy, Yangi Zelandiya, AQSh, Daniya, Malayziya, Koreya Respublikasi, Gruziya, Norvegiya va Buyuk Britaniya ham bu reytingdagi dastlabki o‘nta davlatlar ichiga kiritilgan.
Izoh (0)