Facebook’dagi “Voditeli Tashkenta” guruhi a’zolari Toshkent orqali ulkan yuk olib o‘tib ketilgani haqida xabar bermoqda. “Yuk ortilgan kolonna tezligi soatiga 10 kilometrdan oshmaydi”, — deb yozdi foydalanuvchi. U yukning Toshkent Issiqlik elektr stansiyasi uchun ehtiyot qismlari ekanligini taxmin qildi.
Postga fikr bildirganlarning ko‘pchiligi ushbu yukni o‘zlari ham ko‘rganini qayd etgan. Kimdir uni Samarqand shahrida, kimdir Samarqand—Toshkent avtomobil yo‘lida uchratganini yozgan. Qozog‘istonlik foydalanuvchi esa yukning 3 oy avval Aqtau shahridan (Qozog‘iston) yo‘lga chiqqanini ta’kidlagan.
Guvohlarning ta’kidlashicha, yuk kolonnasiga Synecta yozuvi tushirilgan yuk mashinasi yo‘lboshchilik qilgan.
Eslatib o‘tamiz, oktabr boshida “Toshkent IESda 370 MVt quvvatli bug‘-gaz qurilmasining qurilishi” loyihasi bo‘yicha gaz turbinalari, gazturbinali generatorning va yordamchi uskunalarning asosiy qismlari ta’minlovchi tomonidan yetkazib berilgani xabar qilingan edi. O‘shanda joriy yilning oktabr oyida asosiy bug‘-gaz qurilma uskunalarining yetkazib berilishi rejalashtirilayotgani ma’lum qilingan.
Ushbu uskunalar yetkazib beruvchisi deb taxmin etilayotgan Synecta Central Asia MChJ energetika obyektlarini qurish va ta’mirlash bilan shug‘ullanadi. U Slovakiyaning Synecta a.s. kompaniyasining Toshkentdagi sho‘basi hisoblanadi.
Izoh (0)