Жаҳон банки гуруҳи «Бизнесни юритиш 2014: Самарадорлик доирасидан чиқиб» (Doing Business 2014: Going Beyond Efficiency) навбатдаги йиллик маърузасини эълон қилди. Бу ҳақда Gazeta.uz хабар бермоқда.
Янги рейтингда Ўзбекистон ўтган йилги 149-ўриндан 141-ўринга — 8 поғона юқорига кўтарилди (ўтган йили Ўзбекистон дастлаб 146-ўринда бўлган, бироқ баҳолаш услубининг ўзгариши туфайли 149-ўринга лойиқ кўрилган).
Ҳисоб бўйича 12-бўлган бу йилги «Бизнесни юритиш» маърузаси 189 мамлакатда 2013 йил июнидан 2014 йил майигача корхонанинг яратилиши, қарз тўлай олмаслик муаммоларини ечиш ва ташқи иқтисодий фаолиятни амалга ошириш каби ўнта йўналиш бўйича аниқланади.
Таъкидлаш жоиз, ҳисобот даврида Ўзбекистонда энг сезиларли даражада яхшиланган соҳа — солиқ солиш соҳаси бўлиб, Ўзбекистон бу кўрсаткич бўйича рейтингда ўтган йилги 179-ўриндан 118-ўринга кўтарилган.
Миноритар инвесторлар, хусусий мулкни рўйхатдан ўтказиш, электр тармоқларига уланиш, шартномалар бажарилишини таъминлаш кўрсаткичлари бўйича ҳам яхшиланишлар кузатилган.
Аксинча, корхоналарни рўйхатга олиш, кредит олиш, қурилиш учун рухсат олиш каби соҳаларда эса ёмонлашиш кузатилган. Халқаро савдо-сотиқни юритиш шарт-шароитлари эса ўзгаришсиз қолган.
Қайд этиш лозим, тадбиркорлик фаолияти учун қулай шарт-шароитлар бўйича жаҳон рейтингида кетма-кет тўққиз йилдан буён Сингапур етакчилик қилмоқда. Бундан ташқари, Хитой, Янги Зеландия, АҚШ, Дания, Малайзия, Корея Республикаси, Грузия, Норвегия ва Буюк Британия ҳам бу рейтингдаги дастлабки ўнта давлатлар ичига киритилган.
Изоҳ (0)