“O‘zbekiston temir yo‘llari” davlat aksiyadorlik temiryo‘l kompaniyasiga qarashli “O‘ztemiryo‘lkonteyner” aksiyadorlik jamiyati tomonidan Pop tumanining Chodak qishlog‘ida yuk ortish va tushirish maskani foydalanishga topshirildi. Bu haqda “Xalq so‘zi” gazetasi xabar berdi.
Inshoot yangi barpo etilayotgan “Angren — Pop” elektrlashtirilgan temir yo‘li yonida qurilgan bo‘lib, “Angren” logistika markazidan avtotransportda keltirilgan xalq xo‘jalik yuklarini vodiy viloyatlariga temir yo‘l orqali yetkazishga xizmat qiladi. Hozir zamonaviy texnika vositalari bilan jihozlangan maskanda konteyner maydonlari, shuningdek, bojxona va transport-ekspeditsiya xizmati tashkil etilgan.
Yuk ortish va tushirish maskanining qurilishi Qamchiq dovoni orqali o‘tgan avtomobil yo‘lida tirbandlikni kamaytirish hamda katta miqdorda yonilg‘i materiallarini tejash, shuningdek, Farg‘ona vodiysida temir yo‘l transporti orqali yiliga 603 million tonnadan ortiq yuk tashish imkonini beradi. Yana bir muhim jihati, bugungi kunda bu yerda yuzga yaqin ish o‘rni yaratildi. Ayni chog‘da maskan xududi obodonlashtirilib, ishlovchilar uchun zarur qulayliklar yaratildi. Yaqin vaqt ichida bu yerda “Temiryo‘lobod” stansiyasi ham ishga tushiriladi. Bundan tashqari, yuk terminali yonida maishiy majmualar, oshxona, dam olish joylari va boshqa infratuzilma ob’ektlari bunyod etiladi.
Izoh (0)