“Sport” telekanali Osiyo Chempionatining O‘zbekiston o‘smirlari to‘p suradigan o‘yinlarini translyatsiya qiladi

6-sentabr kuni Tailand poytaxti Bangkok shahrida hisob bo‘yicha 16-marotaba o‘tkaziladigan U-16 o‘smirlar o‘rtasidagi Osiyo Chempionati bahslariga start beriladi. “Sport” telekanali mazkur chempionatning O‘zbekiston ishtirok etadigan o‘yinlarini jonli efirda namoyish etadi. O‘zbekiston terma jamoasi Osiyo Chempionati doirasidagi birinchi uchrashuvini 7-sentabr, yakshanba kuni o‘tkazadi.

“Sport” telekanalidagi manbamizning ma’lum qilishicha, joriy hafta uchun teleko‘rsatuvlar jadvali tuzilayotganda Osiyo Chempionatining translyatsiya qilinishi so‘roq ostida bo‘lgan. Shu bois o‘yinlar, xususan, 7-sentabr Toshkent vaqti bilan soat 14:00 da boshlanadigan O‘zbekiston — Nepal uchrashuvi dasturlar orasiga kiritilmagan. “Daryo” tahririyati bu borada telekanal bilan bog‘langanida, u yerdagi manbamiz dasturga o‘zgartirish kiritish orqali O‘zbekiston va Nepal o‘smirlari o‘rtasidagi bahs jonli efirda namoyish etilishini ma’lum qildi.

Mazkur Osiyo Chempionatida jami 16 ta terma jamoa (saralash bosqichidan muvaffaqiyatli o‘tgan 15 ta terma jamoa va mezbon Tailand termasi) jami to‘rt guruhga bo‘lingan holda musobaqani boshlaydi, deb qayd etdi Uff.uz.

Turnir reglamentiga ko‘ra, har bir guruhdan dastlabki ikki o‘rinni egallagan jamoalar chorak final yo‘llanmasini qo‘lga kiritadi. Osiyo Chempionati o‘yinlari Bangkok shahridagi ikki stadion — Rajamangala va Muangtong stadionlarida o‘tkaziladi. O‘zbekiston U-16 o‘smirlar terma jamoasi guruh o‘yinlarini Bangkokdagi Muangtong stadionida o‘tkazadi.

E’tiborlisi, O‘zbekiston U-16 o‘smirlar terma jamoasi mazkur yosh toifasida amaldagi Osiyo chempioni hisoblanadi. Hozirda Aleksandr Mochinov boshchilik qilayotgan O‘zbekiston o‘smirlar terma jamoasi 5-sentabr kuni Bangkokda ilk rasmiy mashg‘ulotlarini o‘tkazadi. Ayni damda O‘zbekiston U-16 o‘smirlar terma jamoasi va barcha delegatsiya a’zolari Bangkokdagi Emerald mehmonxonasiga joylashgan.

Eslatib o‘tamiz, Aleksandr Mochinov bosh murabbiyligidagi O‘zbekiston U-16 o‘smirlar terma jamoasi musobaqaning “C” guruhida Quvayt, KXDR va Nepal o‘smirlariga qarshi to‘p suradi.

Guruh o‘yinlari jadvali:

“A” guruhi: Tailand, Janubiy Koreya, Ummon, Malayziya (Mazkur guruh o‘yinlari Muangtong stadionida o‘tkaziladi)

1-tur. 6-sentabrJanubiy Koreya — UmmonTailand — Malayziya

2-tur. 8-sentabrMalayziya — Janubiy KoreyaUmmon — Malayziya

3-tur. 10-sentabrTailand — Janubiy KoreyaUmmon — Malayziya

“B” guruhi: Yaponiya, Avstraliya, Xitoy, Gonkong (Mazkur guruh o‘yinlari Rajamangala stadionida o‘tkaziladi)

1-tur. 6-sentabrYaponiya — GonkongAvstraliya — Xitoy

2-tur. 8-sentabrGonkong — AvstraliyaXitoy — Yaponiya

3-tur. 10-sentabrYaponiya — AvstraliyaXitoy — Gonkong

“C” guruhi: O‘zbekiston, Quvayt, KXDR, Nepal (Mazkur guruh o‘yinlari Muangtong stadionida o‘tkaziladi)

1-tur. 7-sentabrO‘zbekiston — Nepal (soat 14:00)Quvayt — KXDR

2-tur. 9-sentabrKXDR — O‘zbekiston (soat 18:00)Nepal — Quvayt

3-tur. 11-sentabrO‘zbekiston — Quvayt (14:00)KXDR — Nepal

“D” guruhi: Eron, Suriya, Saudiya Arabistoni, Qatar

1-tur. 7-sentabrEron — QatarSuriya — Saudiya Arabistoni

2-tur. 9-sentabrQatar — SuriyaSaudiya Arabistoni — Eron

3-tur. 11-sentabrEron — SuriyaSaudiya Arabistoni — Qatar