3-sentabr kuni yangi Sony Xperia Z3 smartfonining taqdimoti bo‘lib o‘tdi. Bu haqda Phonearena.com sayti ma’lumotiga asoslanib “Parol” nashri xabar berdi.
Yangi Sony Xperia Z3 smartfonining qalinligi 7,3 millimetr, og‘irligi esa 152 gramm. Xperia Z2 esa 8,2 mm qalinlikka va 162 gramm og‘irlikka ega edi. Smartfonning boshqa o‘lchamlari 146×72 millimetrni tashkil etadi.
Smartfon Xperia Z2 kabi chang va suvga chidamlilik IP68 sertifikatiga ega. Unda 5,2 dyuym 1080×1920 pikselli displey o‘rnatilgan. Smartfonda 2,5 GGs chastotaga ega to‘rt yadroli Qualcomm Snapdragon 801 protsessori o‘rnatilgan.
Xperia Z3 smartfonining tezkor xotirasi Z2 bilan bir xil – 3Gb, ichki xotirasi esa MicroSD yordamida kengaytirsa bo‘ladigan ikki xil turda – 16 va 32 gigabaytli bo‘ladi. Yangi smartfon batareyasining quvvati 3100 mA·soatni tashkil etadi. Xperia Z2’ning batareyasi esa 3200 mA·at quvvatga ega.
Smartfon asosiy kamerasi Z2 bilan bir xil — 20,7 megapikselli. Biroq, Sony yangi smartfon kamerasi ustida yaxshi ish olib borgan va u Xperia Z2’dan ko‘ra yaxshiroq ishlab chiqilgan. Unda kattaroq Exmor RS kamera sensori o‘rnatilgan, shuningdek kengroq tasvirlarni suratga olish uchun kamera linzasi ham 25 mm kenglikka ega. Smartfonda bir vaqtning o‘zida ikkita video suratga olish uchun Face in, suratlarni tahrirlaydigan AR fun kabi dasturlar mavjud.
Smartfon Android KitKat 4.4.4 operatsion tizimida ishlaydi va unda Bluetooth 4.0 o‘rnatilgan. Kompaniya smartfonning ikki SIM-kartali turini ham sotishni rejalashtirgan. Yangi smartfonning oq, qora, mis va yashil-kumush rangli turlarini harid qilish mumkin bo‘ladi.
Sony Xperia Z3’ning yana bir muhim xususiyatlaridan biri uni PlayStation 4 o‘yin konsoli bilan bog‘lash mumkinligidir. Buning natijasida PS4 o‘yinlarini smartfonning 5,2 dyuymli displeyida ham o‘ynayverish mumkin bo‘ladi.
Yangi smartfon qachon sotuvga chiqishi va qancha narxda sotilishi haqida ma’lumot berilmagan. Sony Xperia Z3 smartfonining suratlarini “Parol” nashridagi ushbu sahifada tomosha qilishingiz mumkin.
Sony kompaniyasi IFA-2014 ko‘rgazmasida Xperia Z3’dan kichikroq displeyli Xperia Z3 Compact va dizaynda Xperia Z3’ga o‘xshash, ammo ancha arzon Xperia E3 smartfonlarini hamda Xperia Z3 Compact Tablet plansheti, SmartWatch 3 aqlli soati, SmartBand Talk — qo‘ng‘iroqlarga javob berish funksiyasiga ega fitnes brasleti kabi gadjetlarini ham taqdim etdi.
Eslatib o‘tamiz, 3-sentabr kuni Samsung kompaniyasi ham yangi Galaxy Note 4 hamda botiq displeyli Galaxy Note Edge planshetofonlarinining taqdimotini o‘tkazdi.
Izoh (0)