Sony Xperia Z2’дан ингичкароқ бўлган янги Xperia Z3 смартфони тақдим этилди

3 сентябрь куни янги Sony Xperia Z3 смартфонининг тақдимоти бўлиб ўтди. Бу ҳақда Phonearena.com сайти маълумотига асосланиб «Пароль» нашри хабар берди.

Янги Sony Xperia Z3 смартфонининг қалинлиги 7,3 миллиметр, оғирлиги эса 152 грамм. Xperia Z2 эса 8,2 мм қалинликка ва 162 грамм оғирликка эга эди. Смартфоннинг бошқа ўлчамлари 146×72 миллиметрни ташкил этади.

Смартфон Xperia Z2 каби чанг ва сувга чидамлилик IP68 сертификатига эга. Унда 5,2 дюйм 1080×1920 пикселли дисплей ўрнатилган. Смартфонда 2,5 ГГц частотага эга тўрт ядроли Qualcomm Snapdragon 801 процессори ўрнатилган.

Xperia Z3 смартфонининг тезкор хотираси З2 билан бир хил – 3Gб, ички хотираси эса MicroSD ёрдамида кенгайтирса бўладиган икки хил турда – 16 ва 32 гигабайтли бўлади. Янги смартфон батареясининг қуввати 3100 мА·соатни ташкил этади. Xperia Z2’нинг батареяси эса 3200 мА·ат қувватга эга.

Смартфон асосий камераси З2 билан бир хил — 20,7 мегапикселли. Бироқ, Sony янги смартфон камераси устида яхши иш олиб борган ва у Xperia Z2’дан кўра яхшироқ ишлаб чиқилган. Унда каттароқ Exmor RS камера сенсори ўрнатилган, шунингдек кенгроқ тасвирларни суратга олиш учун камера линзаси ҳам 25 мм кенгликка эга. Смартфонда бир вақтнинг ўзида иккита видео суратга олиш учун Face in, суратларни таҳрирлайдиган AR fun каби дастурлар мавжуд.

Смартфон Android KitKat 4.4.4 операцион тизимида ишлайди ва унда Bluetooth 4.0 ўрнатилган. Компания смартфоннинг икки SIM-картали турини ҳам сотишни режалаштирган. Янги смартфоннинг оқ, қора, мис ва яшил-кумуш рангли турларини ҳарид қилиш мумкин бўлади.

Sony Xperia Z3’нинг яна бир муҳим хусусиятларидан бири уни PlayStation 4 ўйин консоли билан боғлаш мумкинлигидир. Бунинг натижасида ПS4 ўйинларини смартфоннинг 5,2 дюймли дисплейида ҳам ўйнайвериш мумкин бўлади.

Янги смартфон қачон сотувга чиқиши ва қанча нархда сотилиши ҳақида маълумот берилмаган. Sony Xperia Z3 смартфонининг суратларини «Пароль» нашридаги ушбу саҳифада томоша қилишингиз мумкин.

Sony компанияси IFA-2014 кўргазмасида Xperia Z3’дан кичикроқ дисплейли Xperia Z3 Cомпаcт ва дизайнда Xperia Z3’га ўхшаш, аммо анча арзон Xperia Э3 смартфонларини ҳамда Xperia Z3 Compact Tablet планшети, SmartWatch 3 ақлли соати, SmartBand Talk — қўнғироқларга жавоб бериш функциясига эга фитнес браслети каби гаджетларини ҳам тақдим этди.

Эслатиб ўтамиз, 3 сентябрь куни Samsung компанияси ҳам янги Galaxy Note 4 ҳамда ботиқ дисплейли Galaxy Note Edge планшетофонларинининг тақдимотини ўтказди.