O‘zbekistonlik erkak shaxmatchilar sovrinli o‘rindan joy olish imkoniga ega bo‘ldi

Norvegiyaning Tromse shahrida davom etayotgan 41-Butunjahon shaxmat Olimpiadasining 10-tur uchrashuvlari ortda qoldi. Unda O‘zbekiston erkaklar terma jamoasi ketma-ket uchinchi g‘alabani qo‘lga kiritdi. Bu haqda “Olamsport” xabar bermoqda.

Bu safar 11-raqam ostida tasniflangan gollandiyalik grossmeysterlar 2,5:1,5 hisobi bilan mag‘lub etildi. Reyting bo‘yicha o‘zbekistonlik shaxmatchilardan ancha ustun bo‘lgan grossmeysterlarga qarshi uchrashuvda, ayniqsa, to‘rtinchi taxtada o‘ynagan Jahongir Vohidov qahramonlik ko‘rsatdi. U tajribali grossmeyster Robin Van Kampenni mot qilishning uddasidan chiqdi.

Bu tarixiy g‘alaba Olimpiadada 33-raqam ostida saralangan O‘zbekiston termasiga sovrinli o‘rinlardan birini egallash imkonini berdi. Bungacha o‘tkazilgan uchta partiyada Rustam Qosimjonov boshchiligidagi O‘zbekiston termasi raqiblari bilan murosaga kelgandi:

• Anish Giri (2745) — Rustam Qosimjonov (2700)  0,5:0,5
• Ervin Lami (2631) — Anton Filippov (2615)  0,5:0,5
• Lyuk Van Veli (2662) — Marat Jumayev (2510) 0,5:0,5
• Robin Van Kampen (2638) — Jahongir Vohidov (2471) 0:1

Mazkur g‘alabadan so‘ng, O‘zbekiston erkaklar terma jamoasi 15 ochko bilan 7-o‘ringa ko‘tarilib oldi. E’tiborga molik jihati, 3-o‘rinni egallab turgan Fransiya terma jamoasida ham o‘zbekistonlik shaxmatchilar kabi 10 ta uchrashuvdan yettita g‘alaba, bitta durang va ikki mag‘lubiyat bor. O‘zbekiston faqat qo‘shimcha ko‘rsatkichlarga ko‘ra, 7-pog‘onadan joy olgan.