“Radar.uz” tomonidan 4-avgust kuni monitoring o‘tkazilgan va shu vaqt davomida 85 ta qo‘pol qoidabuzarlik aniqlangan chorrahaga kameralar o‘rnatila boshlandi.
So‘nggi bir necha hafta davomida ijtimoiy tarmoqlar a’zolari bir qancha markaziy ko‘chalarda yo‘l ishlari olib borilayotgani, ishlar davomida yo‘llar yopib qo‘yilayotgani haqida xabar bermoqda. Internet-foydalanuvchilarning fikricha, bu ishlar davomida chorrahalarda avtomobil harakatini tartibga solish maqsadida kuzatuv kameralari o‘rnatilmoqda.
Xuddi shunday ishlar KHAY/Bodomzor yo‘li chorrahasida bir necha kundan buyon olib borilmoqda. “Daryo” muxbiriga yo‘l ishlari olib borilayotgan joydan xabar berishlaricha, ushbu chorrahaga kuzatuv kameralari o‘rnatilmoqda. Yo‘l ishlari tenderda g‘olib bo‘lgan tashkilot tomonidan amalga oshirilmoqda.
Quruvchilarning ta’kidlashicha, shahardagi kameralari yozib olgan videotasvir Yo‘l harakati xavfsizligi bosh boshqarmasiga uzatiladi. Kameralar qachon ishga tushishi haqida rasmiy ma’lumot yo‘q.
Eslatib o‘tamiz, “Radar.uz” tomonidan KHAY/Bodomzor yo‘li chorrahasida monitoring 4-avgust, dushanba kuni soat 18:00 dan 19:00 ga qadar o‘tkazilgan bo‘lib, ushbu muddat oralig‘ida 85 ta qoidabuzarlik holatlari aniqlangan edi.
Umid qilamizki, o‘rnatilayotgan kameralar yo‘l harakatini tartibga solish, qoidabuzarliklarni kamaytirish, qoidabuzarlarni esa munosib jazolash uchun xizmat qiladi.
Izoh (0)