Fayllarni saqlash, pochtani tekshirish va kalitni topishda yordam beruvchi aqlli gadjet yaratildi

The Smart Keychain deb nomlanuvchi ushbu gadjet kalitga mahkamlab qo‘yiladi va uni aqlli gadjetlar sirasiga qo‘shish mumkin.

TechCrunch ma’lumotiga asoslanib “Parol” nashri xabar berishicha, ushbu gadjet fayllarni saqlash uchun USB fleshka vazifasini o‘taydi. Bu bilan uni aqlli gadjet deyish mumkin emasdir, lekin u orqali elektron pochtangizga kelgan xabarlarni o‘qishingiz, kalendarda belgilab qo‘yilgan rejalar haqida ogohlantirishlar olish va gadjet kalitga mahkamlab qo‘yilgani bois, yo‘qolgan kalitlarni topish ham mumkin.

Kalitingizni topa olmayotgan bo‘lsangiz, smartfoningizdagi maxsus dastur tugmasini bosasiz va The Smart Keychain gadjetidan ovoz chiqadi. Hozirda dastur iOS qurilmalari uchun mavjud, lekin Android qurilmalar uchun ham chiqariladi.

Qurilmani Indiegogo saytidan buyurtma berish mumkin. The Smart keychain 59 dollarga baholangan. Uning 8 Gb, 16 Gb va 32 Gb xotiralik turlari mavjud.