Toshkentda bolalarga bag‘ishlangan xayriya tadbiri o‘tkazildi

Poytaxtdagi “Toshkentlend” bolalar istirohat bog‘ida “Har bir farzandga mehr, e’tibor!” haftaligi doirasida xayriya tadbiri o‘tkazildi. Bu haqda O‘zA xabar qildi.

“Sog‘lom avlod uchun” xalqaro xayriya fondi, “Sen yolg‘iz emassan” Respublika jamoatchilik bolalar jamg‘armasi, O‘zbekiston Respublikasi Xalq ta’limi va Tashqi iqtisodiy aloqalar, investitsiyalar va savdo vazirliklari, Toshkent shahri va viloyati hokimliklari hamkorligida tashkil etilgan tadbirga Toshkent, Sirdaryo viloyatlari va poytaxtdagi mehribonlik uylari, SOS – bolalar mahallalari tarbiyalanuvchilari, umumta’lim maktablari faol o‘quvchilari, el-yurt tinchligi va osoyishtaligi yo‘lida halok bo‘lgan xizmatchilarning farzandlari taklif etildi.

– Yoshlarga ko‘rsatilayotgan yuksak mehr-e’tibor bizni a’lo o‘qish, namunali xulq, faollik va tashabbuskorlik ko‘rsatishga undamoqda, – deydi Guliston “Bolalar shaharchasi” tarbiyalanuvchisi Diyora Umrzoqova. – Bizga berilayotgan imkoniyatlardan unumli foydalanib, O‘zbekistonning yanada obod bo‘lishiga munosib hissa qo‘shishga, ulkan yutuqlarga erishishga harakat qilaman.

Xayriya tadbiri davomida bog‘dagi attraksionlar bolalarning ixtiyorida bo‘ldi. Kichkintoylarga sovg‘alar topshirildi.