Тошкентда болаларга бағишланган хайрия тадбири ўтказилди
Пойтахтдаги «Тошкентленд» болалар истироҳат боғида «Ҳар бир фарзандга меҳр, эътибор!» ҳафталиги доирасида хайрия тадбири ўтказилди. Бу ҳақда ЎзА хабар қилди.
«Соғлом авлод учун» халқаро хайрия фонди, «Сен ёлғиз эмассан» Республика жамоатчилик болалар жамғармаси, Ўзбекистон Республикаси Халқ таълими ва Ташқи иқтисодий алоқалар, инвестициялар ва савдо вазирликлари, Тошкент шаҳри ва вилояти ҳокимликлари ҳамкорлигида ташкил этилган тадбирга Тошкент, Сирдарё вилоятлари ва пойтахтдаги меҳрибонлик уйлари, СOS – болалар маҳаллалари тарбияланувчилари, умумтаълим мактаблари фаол ўқувчилари, эл-юрт тинчлиги ва осойишталиги йўлида ҳалок бўлган хизматчиларнинг фарзандлари таклиф этилди.
– Ёшларга кўрсатилаётган юксак меҳр-эътибор бизни аъло ўқиш, намунали хулқ, фаоллик ва ташаббускорлик кўрсатишга ундамоқда, – дейди Гулистон «Болалар шаҳарчаси» тарбияланувчиси Диёра Умрзоқова. – Бизга берилаётган имкониятлардан унумли фойдаланиб, Ўзбекистоннинг янада обод бўлишига муносиб ҳисса қўшишга, улкан ютуқларга эришишга ҳаракат қиламан.
Хайрия тадбири давомида боғдаги аттракционлар болаларнинг ихтиёрида бўлди. Кичкинтойларга совғалар топширилди.
