31-may, shanba kuni Toshkent axborot texnologiyalari universiteti katta zalida “Uznet ummoni” konferensiyasi bo‘lib o‘tadi. Konferensiya “Muloqot” saytlar tarmog‘i va TATU hamkorligida tashkil etilgan bo‘lib, unda uznet, uning kelajagi va undagi muammolar muhokama etiladi. Tadbirda ishtirok etish uchun konferensiya saytida ro‘yxatdan o‘tish zarur.
“‘Uznet ummoni’ uznet va uznetdagi startaplarga bag‘ishlangan mini-konferensiya bo‘lib, unda sayt, kompaniya va g‘oyalar egalari o‘z fikrlari bilan bo‘lishadilar. Ma’ruzalar dialog ko‘rinishida bo‘lib, ular ham ma’ruzachilar, ham tinglovchilarga foydali bo‘lishini maqsad qilganmiz”, — deyiladi tadbir saytida. Konferensiyada uznetda o‘z o‘rnini topa olgan sayt egalaridan tashqari yangi ochilgan kompaniyalar vakillari ma’ruza qiladi:
- O‘zbek onlayn-jurnalistikasining ahvoli. Muhrim A’zamxo‘jayev, Kun.uz rahbari;
- AKT mahsulotlarini o‘zbekchalashtirish: muammo va takliflar. Hamza Foziljonov, Redpoll kompaniyasi rahbari;
- Uzbloggerlar chempionati haqida. Xushnudbek Xudayberdiyev, huquqshunos, blogger;
- Uznetda kontent yaratish muammolari. Gulruxsora Xudayberdiyeva, jurnalist, blogger;
- O‘zbekistonda AKT-kompaniyalar ahvoli, muammolari va kelajagi. Akmal Payziyev, MaxTrack, CityTaxi;
- O‘zbekcha SMM: hozirgi holat va kelajakdagi istiqbollari. To‘lqin Yusupov, Technecy kompaniyasi rahbari.
Siz AKT sohasiga qiziqasizmi? Uznetdagi muammolarni yechishga o‘z hissangizni qo‘shmoqchimisiz? O‘zbekistonda o‘z kompaniyangizni ochib, muvaffaqiyatli bo‘lishni istaysizmi? U holda konferensiya saytida ro‘yxatdan o‘ting va tinglovchi sifatida ishtirok eting.
Izoh (0)