Samarqanddagi konferensiyada qatnashish uchun xorijdan olimlar tashrif buyurdi (foto)
“O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati” mavzusidagi xalqaro ilmiy konferensiya ishida ishtirok etish uchun ellikka yaqin davlatdan olimlar va ziyolilar, nufuzli xalqaro tashkilotlarning rahbarlari va vakillari 14-may kuni Samarqandga keldi, deb xabar beradi O‘zA.
– O‘zbekistonga uchinchi marta kelishim. Universitetimiz O‘zbekiston Fanlar akademiyasi Astronomiya instituti bilan yaqin hamkorlik aloqalari o‘rnatgan. Ushbu institutning Maydanak observatoriyasi geografik joylashuvi, qulay atmosfera sharoiti va astroiqlimi jihatidan jahondagi nufuzli rasadxonalar qatorida turadi. Maydanak observatoriyasidagi teleskopga o‘rnatilgan zamonaviy rusumdagi raqamli kamera O‘zbekiston – Janubiy Koreya hamkorligining amaliy natijasidir, — deydi Seul Milliy universitetining Fizika va astronomiya kafedrasi professori Sang Gak Li.
– Xalqaro konferensiyada Alisher Navoiy ijodiga bag‘ishlangan ma’ruzam bilan ishtirok etaman. Alisher Navoiy ijodiy merosi boqiy, badiiy dahosi zamon va makon chegaralarini bilmaydi, — dedi Polshaning Varshava universiteti kafedra mudiri Yanush Kjizovskiy. — Navoiyning go‘zal g‘azallari, mana, oradan besh yarim asr o‘tsa hamki, millionlab odamlarni hayajonga solib kelmoqda. Navoiy she’riyatidagi zohiriy ma’no yangiliklari bilan birga botiniy sifatlarni ham o‘rgangandagina ularni idrok etishga erishish mumkin.
– Mamlakatingizga har gal kelganimda O‘zbekiston tanib bo‘lmas darajada o‘zgarib, yanada go‘zallashganining guvohi bo‘laman. Ijtimoiy-iqtisodiy, ilmiy sohalarda, shuningdek, bunyodkorlik jabhasida ro‘y berayotgan ulkan o‘zgarishlar va yangilanishlar havasimni tortadi, — deb fikr bildirdi Buyuk Britaniyadagi Kembrij universitetining Markaziy Osiyo bo‘yicha forumi raisi Siddxart Saksena. — O‘zbekistonda xorijiy tillarni o‘rganish faollashib borayotgani ta’lim sohasiga qaratilayotgan alohida e’tibor samaralaridandir.
Eslatib o‘tamiz, “O‘rta asrlar Sharq allomalari va mutafakkirlarining tarixiy merosi, uning zamonaviy sivilizatsiya rivojidagi roli va ahamiyati” mavzusidagi xalqaro ilmiy konferensiya 15—16-may kunlari Samarqand shahrida o‘tkaziladi.
