«Ўрта асрлар Шарқ алломалари ва мутафаккирларининг тарихий мероси, унинг замонавий цивилизация ривожидаги роли ва аҳамияти» мавзусидаги халқаро илмий конференция ишида иштирок этиш учун элликка яқин давлатдан олимлар ва зиёлилар, нуфузли халқаро ташкилотларнинг раҳбарлари ва вакиллари 14 май куни Самарқандга келди, деб хабар беради ЎзА.
– Ўзбекистонга учинчи марта келишим. Университетимиз Ўзбекистон Фанлар академияси Астрономия институти билан яқин ҳамкорлик алоқалари ўрнатган. Ушбу институтнинг Майданак обсерваторияси географик жойлашуви, қулай атмосфера шароити ва астроиқлими жиҳатидан жаҳондаги нуфузли расадхоналар қаторида туради. Майданак обсерваториясидаги телескопга ўрнатилган замонавий русумдаги рақамли камера Ўзбекистон – Жанубий Корея ҳамкорлигининг амалий натижасидир, — дейди Сеул Миллий университетининг Физика ва астрономия кафедраси профессори Санг Гак Ли.
– Халқаро конференцияда Алишер Навоий ижодига бағишланган маърузам билан иштирок этаман. Алишер Навоий ижодий мероси боқий, бадиий даҳоси замон ва макон чегараларини билмайди, — деди Польшанинг Варшава университети кафедра мудири Януш Кжизовский. — Навоийнинг гўзал ғазаллари, мана, орадан беш ярим аср ўца ҳамки, миллионлаб одамларни ҳаяжонга солиб келмоқда. Навоий шеъриятидаги зоҳирий маъно янгиликлари билан бирга ботиний сифатларни ҳам ўргангандагина уларни идрок этишга эришиш мумкин.
– Мамлакатингизга ҳар гал келганимда Ўзбекистон таниб бўлмас даражада ўзгариб, янада гўзаллашганининг гувоҳи бўламан. Ижтимоий-иқтисодий, илмий соҳаларда, шунингдек, бунёдкорлик жабҳасида рўй бераётган улкан ўзгаришлар ва янгиланишлар ҳавасимни тортади, — деб фикр билдирди Буюк Британиядаги Кембриж университетининг Марказий Осиё бўйича форуми раиси Сиддхарт Саксена. — Ўзбекистонда хорижий тилларни ўрганиш фаоллашиб бораётгани таълим соҳасига қаратилаётган алоҳида эътибор самараларидандир.
Эслатиб ўтамиз, «Ўрта асрлар Шарқ алломалари ва мутафаккирларининг тарихий мероси, унинг замонавий цивилизация ривожидаги роли ва аҳамияти» мавзусидаги халқаро илмий конференция 15—16 май кунлари Самарқанд шаҳрида ўтказилади.
Изоҳ (0)