Toshkent shahar Yo‘l-patrul xizmati tarkibida mototsiklda harakatlanuvchi yangi bo‘linma tuziladi

Toshkent shahar Ichki ishlar boshqarmasi Yo‘l harakati xavfsizligi davlat xizmati yo‘l-patrul xizmati tuzilmasida maxsus motoguruh tashkil qilish rejalashtirilmoqda. Bu haqda uz24.uz murojaatiga javoban Yagona interaktiv davlat xizmatlari portali orqali O‘zbekiston Ichki ishlar vazirligi ma’lum qildi.

“Motoguruh xodimlari formasi umummuomaladagidan farqli bo‘lmaydi, shunchaki mototsiklda harakatlanish uchun moslashtiriladi”, — deyiladi javob xatida.

Ma’lum bo‘lishicha, tuziladigan guruhning asosiy vazifalari yo‘llarda tirbandlik yuzaga kelishining oldini olish, yuzaga kelgan taqdirda esa harakatni tezkorlik bilan tartibga solish, yo‘l harakati qoidalarini buzgan haydovchilarga nisbatan tegishli choralarni qo‘llash va boshqalardan iborat bo‘ladi.

Mototsikllar maxsus rangda bo‘lib, alohida vazifalar uchun foydalanilishi sababli, ularga bunday transport vositasi harakatlanishi taqiqlangan hududlarda ham yurishga ruxsat etiladi.

Bundan avval internet tarmog‘ida mototsikl minib yurgan Toshkent militsionerlari aks etgan suratlar tarqalib ketgan edi. Keyinroq ularga mototsiklda harakatlanish uchun yangi forma joriy qilingani haqida xabarlar paydo bo‘ldi.