O‘zbekiston Respublikasi aloqa, axborotlashtirish va telekommunikatsiya texnologiyalari davlat qo‘mitasi O‘zbekiston hududlarida shoshilinch va tezkor xizmatlarning “0” bilan boshlanuvchi raqamlarini “10x”ga, “0xx” raqamlarini “10xx”ga o‘zgartirish bo‘yicha rejalarni tasdiqladi.
Aloqa qo‘mitasi matbuot xizmatining xabar berishicha, bundan ko‘zlangan maqsad shoshilinch va tezkor xizmatlari telefon raqamlarini tizimlashtirish, shaharlararo va xalqaro telefon tarmoqlariga chiqishda ishlatiladigan old raqamlarni xalqaro standartlar asosida uyg‘unlashtirishdan iborat.
Aholi mazkur masalalar yuzasidan o‘zgarishlar bilan Qo‘mita hamda telekommunikatsiya operatorlari veb-saytlaridan, shu bilan birgalikda Yagona interaktiv davlat xizmatlari portalidan boxabar bo‘lib borishlari mumkin bo‘ladi.
Dasturga muvofiq, joriy yil may oyining ikkinchi yarmidan boshlab shoshilinch va tezkor xizmatlarning “0x” bilan boshlanadigan telefon raqamlarini “10x” tizimiga, “0xx” tizimidagi telefon raqamlarini “10xx” tizimiga o‘tkazish bo‘yicha ishlar amalga oshirilishi rejalashtirilgan.
Shaharlararo va xalqaro telefon tarmoqlariga chiqishda ishlatiladigan old raqamlarni xalqaro talab darajalariga moslashtirish 2014 yilning oktyabr oyida amalga oshiriladi va shundan so‘ng yurtdoshlarimiz shaharlararo qo‘ng‘iroqlarni “0” old raqami, xalqaro qo‘ng‘iroqlarni “00” old raqamlari yordamida amalga oshirishlari mumkin bo‘ladi.
Shoshilinch va tezkor xizmatlar telefon raqamlari tizimida bo‘layotgan o‘zgarishlar mobaynida turli tushunmovchilik va noqulayliklarning oldini olish maqsadida mazkur telefon raqamlarining 3 oy davomida bir vaqtning o‘zida har ikala – yangi va eski tizimlarda faoliyat ko‘rsatishi ta’minlanadi. Bu haqda aholi o‘rtasida tushuntirish va targ‘ibot ishlari olib borilishi belgilangan.
Izoh (0)