Qarshi shahrida tennis bo‘yicha erkaklar o‘rtasidagi “Fyuchers” hamda Xalqaro tennis federatsiyasi – ITF musobaqalari taqvimiga kiruvchi xotin-qizlar o‘rtasidagi xalqaro turnirlar o‘tkazilmoqda. O‘zAning xabar berishicha, musobaqalarda o‘zbekistonliklar bilan birga Buyuk Britaniya, Vengriya, Gollandiya, Gretsiya, Irlandiya, Polsha, Ruminiya, Rossiya, Belarus, Qozog‘iston, Qirg‘iziston, Hindiston kabi davlatlardan tennischilar g‘oliblik uchun kuch sinashmoqda.
“Fyuchers” turnirining yakkaliklar o‘rtasidagi asosiy tur bahslarida o‘zbekistonlik Sarvar Ikromov rossiyalik Vitaliy Kachanovskiyni 4:6, 6:0, 6:4 hisobida mag‘lubiyatga uchratdi. Shuningdek, Shonig‘mat Shofayziyev, Temur Ismoilov, Rasul Ahmadaliyev, Mixail Yesipov va Botir Sapayev ham dastlabki uchrashuvni o‘z foydasiga hal qildi.
Rossiyalik Roman Sayfullin, Mixail Vaks, Denis Matsukevich, Fedor Chervyakov, irlandiyalik Sem Berri, gretsiyalik Markos Kalovelonis, polshalik Petr Gadomskiy, belaruslik Artur Dubinskiy, ukrainalik Denis Molchanov va Vladimir Ujilovskiy ham navbatdagi bosqichga yo‘l oldi.
Juftliklar bahsida gretsiyalik Markos Kalovelonis bilan hamkorlikda o‘ynayotgan hamyurtimiz Shonig‘mat Shofayziyev belaruslik tennischilar Artur Dubinskiy va Aleksandr Xalinkoni 6:3, 6:4 hisobida yengib, chorak finalga chiqdi. Hamyurtlarimiz Sanjar Fayziyev va Temur Ismoilov, Humoyun Sultonov va Mixail Yesipov, Rasul Ahmadaliyev va Pavel Soy, rossiyalik Denis Matsukevich va Mixail Vaks, polshalik Petr Gadomskiy va Adam Majrovich, irlandiyalik Sem Berri va fransiyalik Roman Bauvi juftliklari ham dastlabki bahsni g‘alaba bilan yakunladi.
Xotin-qizlar o‘rtasidagi xalqaro turnirning yakkalik bahslarida ishtirok etayotgan Sabina Sharipova ukrainalik Ganna Poznixirenkodan 7:5, 6:2 hisobida ustun kelgan bo‘lsa, Nigina Abduraimova qirg‘izistonlik Kseniya Palkinani 6:0, 6:1 hisobida yengdi. Rossiyalik Anastasiya Saitova, Yana Buchina, Yekaterina Bichkova, Polina Monova, chexiyalik Tereza Smitkova, gollandiyalik Eva Vakanno, Buyuk Britaniya vakilalari Naomi Broadi va Tara Mur ham musobaqadagi ilk g‘alabasini nishonladi.
Juftliklar bahsida Sabina Sharipova va qozog‘istonlik Kamila Kerimbayeva, yana bir o‘zbekistonlik Vlada Yekshibarova va rossiyalik Alyona Tarasova raqiblarini mag‘lubiyatga uchratib, chorak finalga chiqdi. Hindistonlik Ankita Raina va Pratanda Tombare, rossiyalik Yana Sizikova va gollandiyalik Eva Vakanno, ukrainalik Ganna Poznixirenko va chexiyalik Tereza Smitkova juftliklari ham dastlabki uchrashuvda g‘oliblikni qo‘lga kiritdi.
Izoh (0)