Қарши шаҳрида теннис бўйича эркаклар ўртасидаги «Фьючерс» ҳамда Халқаро теннис федерацияси – ITF мусобақалари тақвимига кирувчи хотин-қизлар ўртасидаги халқаро турнирлар ўтказилмоқда. ЎзАнинг хабар беришича, мусобақаларда ўзбекистонликлар билан бирга Буюк Британия, Венгрия, Голландия, Греция, Ирландия, Польша, Руминия, Россия, Беларус, Қозоғистон, Қирғизистон, Ҳиндистон каби давлатлардан теннисчилар ғолиблик учун куч синашмоқда.
«Фючерс» турнирининг яккаликлар ўртасидаги асосий тур баҳсларида ўзбекистонлик Сарвар Икромов россиялик Виталий Качановскийни 4:6, 6:0, 6:4 ҳисобида мағлубиятга учратди. Шунингдек, Шониғмат Шофайзиев, Темур Исмоилов, Расул Аҳмадалиев, Михаил Есипов ва Ботир Сапаев ҳам дастлабки учрашувни ўз фойдасига ҳал қилди.
Россиялик Роман Сайфуллин, Михаил Вакс, Денис Мацукевич, Федор Червяков, ирландиялик Сем Берри, грециялик Маркос Каловелонис, полшалик Петр Гадомский, беларуслик Артур Дубинский, украиналик Денис Молчанов ва Владимир Ужиловский ҳам навбатдаги босқичга йўл олди.
Жуфтликлар баҳсида грециялик Маркос Каловелонис билан ҳамкорликда ўйнаётган ҳамюртимиз Шониғмат Шофайзиев беларуслик теннисчилар Артур Дубинский ва Александр Халинкони 6:3, 6:4 ҳисобида енгиб, чорак финалга чиқди. Ҳамюртларимиз Санжар Файзиев ва Темур Исмоилов, Ҳумоюн Султонов ва Михаил Есипов, Расул Аҳмадалиев ва Павел Сой, россиялик Денис Мацукевич ва Михаил Вакс, полшалик Петр Гадомский ва Адам Мажрович, ирландиялик Сем Берри ва франсиялик Роман Бауви жуфтликлари ҳам дастлабки баҳсни ғалаба билан якунлади.
Хотин-қизлар ўртасидаги халқаро турнирнинг яккалик баҳсларида иштирок этаётган Сабина Шарипова украиналик Ганна Познихиренкодан 7:5, 6:2 ҳисобида устун келган бўлса, Нигина Абдураимова қирғизистонлик Ксения Палкинани 6:0, 6:1 ҳисобида енгди. Россиялик Анастасия Саитова, Яна Бучина, Екатерина Бичкова, Полина Монова, чехиялик Тереза Смиткова, голландиялик Эва Ваканно, Буюк Британия вакилалари Наоми Броади ва Тара Мур ҳам мусобақадаги илк ғалабасини нишонлади.
Жуфтликлар баҳсида Сабина Шарипова ва қозоғистонлик Камила Керимбаева, яна бир ўзбекистонлик Влада Екшибарова ва россиялик Алёна Тарасова рақибларини мағлубиятга учратиб, чорак финалга чиқди. Ҳиндистонлик Анкита Раина ва Пратанда Томбаре, россиялик Яна Сизикова ва голландиялик Эва Ваканно, украиналик Ганна Познихиренко ва чехиялик Тереза Смиткова жуфтликлари ҳам дастлабки учрашувда ғолибликни қўлга киритди.
Изоҳ (0)