Ko‘ksaroy qarorgohida 7-mart kuni Shavkat Mirziyoyev ishtirokida 8 mart — Xalqaro xotin-qizlar kuni munosabati bilan tantanali marosim bo‘lib o‘tdi. Prezident matbuot xizmati davlat rahbarining tantanali marosimdagi nutqini e’lon qildi.
“Ko‘pmillatli butun yurtimiz ayollarini 8-mart – Xalqaro xotin-qizlar bayrami bilan chin qalbimdan samimiy muborakbod etaman. Mutafakkir bobomiz Alisher Navoiy buyuk ona siymosi, mo‘tabar ayol zotini ulug‘lab, ularning baxt-saodati yo‘lida barchamizni fidokor bo‘lishga da’vat etgani albatta bejiz emas.
Chindan ham, mehr-oqibat, olijanoblik, muhabbat va sadoqat kabi yuksak insoniy qadriyatlarni kamol toptirishda, oila qo‘rg‘onini mustahkamlashda sizlarning xizmatingizni hech narsa bilan qiyoslab bo‘lmaydi.
Bugungi qutlug‘ bayramning fayzli Ramazon oyida bo‘lib o‘tayotgani uning ezgu ruhi va mazmunini yanada oshirmoqda. Muqaddas dinimiz ham muhtarama onalarimiz, dilbar opa-singillarimiz, munis qizlarimizga hamisha yaxshilik qilishga, ularning izzat-hurmatini joyiga qo‘yishga buyuradi. Mana shunday quvonchli ayyomlar barchangizga muborak bo‘lsin”, dedi prezident o‘z nutqida.
Davlat rahbari bugungi kunda ayollar turli soha va tarmoqlarda O‘zbekiston taraqqiyoti uchun munosib hissa qo‘shayotganini minnatdorlik bilan e’tirof etdi. Masalan, 2017-yilda boshqaruv sohasida xodimlarning 20 foizini xotin-qizlar tashkil etgan bo‘lsa, hozirgi vaqtda bu raqam 35 foizga yetdi. Oliy Majlis Qonunchilik palatasi deputatlarining 38 foizini, Senat a’zolarining 27 foizini ayollar tashkil etmoqda.
“Ayollarning davlat boshqaruvi va parlament faoliyatidagi ishtiroki kuchaygani jamiyatimiz rivojiga ham ijobiy ta’sir etayotganini hayotning o‘zi ko‘rsatmoqda. Eng muhimi, aql-zakovatli, bilimli va iste’dodli xotin-qizlarimiz davlat va jamiyatning barcha sohalarida namuna bo‘lishmoqda”, deydi prezident.
O‘tgan yili Olimpiya va Paralimpiya o‘yinlarida mamlakat delegatsiyasi tarkibidagi ayol sportchilardan 3 nafari oltin, 8 nafari kumush, 3 nafari bronza medalini qo‘lga kiritgani O‘zbekiston tarixida ilgari bo‘lmagan natija ekanligini qayd etdi. Qizlar madaniyat va san’at sohasida ham O‘zbekiston bayrog‘ini baland ko‘tarayotganini bildirdi. O‘tgan yili madaniyat va san’at sohasidagi nufuzli xalqaro tanlovlarda 25 nafar, mamlakat miqyosidagi ko‘rik-tanlovlarda esa 71 nafar iste’dodli qizlar g‘olib bo‘lgani shundan dalolat berishini ta’kidladi.
“Mana shunday ayollarimiz safi kengayishi, qizlarimiz bunyodkor avlod bo‘lib maydonga chiqishi uchun kelgusida ularga qo‘shimcha sharoitlar yaratib beramiz”, dedi prezident.
Ayollari o‘qimishli va kasb-hunarli bo‘lgan yurtda tinchlik va taraqqiyot bo‘lishini, ayollari ma’rifatli bo‘lgan xalq albatta baxtli bo‘lishini aytdi. Shavkat Mirziyoyev o‘ziga katta ijtimoiy mas’uliyat olgan ishbilarmon xotin-qizlarni “Yangi O‘zbekistonning bunyodkor ayollari” deb atadi va ularga chuqur minnatdorlik bildirdi.
“Ularga qanday qo‘shimcha sharoit va yengilliklar kerak bo‘lsa, yaratib berishga tayyorman”, dedi prezident.
“Bir haqiqatni barchamiz yaxshi tushunib olishimiz zarur. Ayollarning tashvish va mashaqqati ham, zimmasidagi mas’uliyati ham erkaklarga nisbatan ancha yuqori. Uy-ro‘zg‘or ishlari va farzand tarbiyasidan ortib, ta’lim olayotgan, mehnat qilayotgan va tadbirkorlik bilan shug‘ullanayotgan xotin-qizlar zamonamizning haqiqiy qahramonlari, desak, to‘g‘ri bo‘ladi”, dedi prezident.
Davlat rahbari Yangi O‘zbekistonda xotin-qizlarning og‘irini yengil qilish, ular uchun barcha sohalarda zarur sharoitlarni yaratib berish doimo davlat siyosatining eng ustuvor yo‘nalishlaridan biri bo‘lib qolishini aytdi.
Shavkat Mirziyoyev barcha ayollarga sihat-salomatlik, xonadonlariga tinchlik-omonlik, dunyodagi eng katta boylik – oilaviy baxt-saodat yor bo‘lishini tiladi. Vatanning yangi yuksalish davrini barpo etishda ayollar doimo oldingi safda bo‘lishiga ishonch bildirdi.
Izoh (0)