Toshkent shahar Yunusobod tumanida tunda niqobli shaxslar raqamsiz ekskavatorda daraxtga shikast yetkazgani to‘g‘risida xabar berilgan edi. Bosh prokuratura ushbu qonunbuzar shaxslar qo‘lga olinganini ma’lum qildi.
Foto: Bosh prokuratura matbuot xizmati
15-aprel kuni nomaʼlum shaxslar tomonidan yuzlariga niqob taqqan holda Toshkent shahrining Yunusobod tumanining 8-mavzesida maxsus qurilish texnikasidan foydalanib, ko‘p qavatli aholi yashash hududida ko‘p yillik daraxtlarni qasddan nobud qilgan.
Prokuratura organlari tomonidan mazkur xabar asosida tekshirish o‘tkazilmoqda. Hozirda huquqbuzarlarning shaxsi to‘liq aniqlanib, tegishli protsessual chora-tadbirlar amalga oshirilmoqda.
“Nazorat tadbiri davomida daraxtlarni nobud qilgan shaxslar va hududda qurilish ishlari amalga oshirishni rejalashtirgan xo‘jalik yurituvchi subyektlar mansabdor shaxslarining xatti-harakatlariga huquqiy baho berilishi taʼminlanadi”, — deyiladi xabarda.
2023-yil sentyabrda Olmazor tumanida daraxtlar drel yordamida teshilib, quritilayotgani aytilgan video e’lon qilingandi. O‘shanda daraxtlarning quritilishi natijasida tabiatga yetkazilgan zarar miqdori 534 million so‘mni tashkil etgan edi.
Izoh (0)