Statistika agentligi 2025-yil yanvar-fevral oylaridagi mamlakat sanoat ko‘rsatkichlarini eʼlon qildi.
Agentlik tahliliga ko‘ra, 2025-yilning birinchi ikki oyida 189,4 tonna avtomobil benzini ishlab chiqarildi. Taqqoslash uchun, 2024-yil mos davrida 241,1 tonna, 2023-yil ilk ikki oyida esa 263,9 tonna benzin ishlab chiqarilgan.
Yanvar-fevralda dizel yoqilg‘isi ishlab chiqarish ham keskin kamayib, 74,5 tonnani tashkil etgan. O‘tgan yil mos davrida bu miqdor 123,1 tonna bo‘lgan.
Tabiiy gaz qazib olish hajmi ham tarixiy minimumlarga pasayishda davom etgan. Ikki oy ichida 7,4 mlrd kub metr gaz qazib olingan. Taqqoslash uchun, 2024-yil mos davrida 7,7 mlrd kub metr, 2023-yilning ilk ikki oyida 8,2 mlrd kub metr gaz qazilgan.
Joriy yil yanvar-fevralda 14 mlrd kilovatt soat elektr energiyasi ishlab chiqarildi. 2024-yil mos davrida bu raqam 14,6 mlrd kilovatt soat bo‘lgan.
Joriy yilning dastlabki ikki oyida respublikada jami 53 522 dona yengil avtomobillar ishlab chiqarildi (2024-yil mos davrida 53 329 dona).
O‘zbekistonda hamon Chevrolet avtomobillari ishlab chiqarilishi yuqori ulushni tashkil etmoqda. Yanvar fevral oylarida mamlakat miqyosida eng ko‘p — 19 461 dona Cobalt ishlab chiqarildi. Bu o‘tgan yil mos davriga nisbatan 21,1 foizga ko‘p (2024-yilda 16 067 dona).
Keyingi o‘rinda zavoddan chiqqan Damas (12 983 dona) mashinalari soni ko‘p (2024-yilda 11 752 ta). Onix ishlab chiqarish ham 25,4 foizga ortib, 6 718 donaga yetgan (o‘tgan yil mos davrida 5 357 dona).
Shu bilan birga, ikki oy mobaynida 5 837 dona Tracker, 4 102 dona Kia, 3 812 dona maxsus yengil avtomobillar, 1 912 dona BYD, 1 392 dona Chery, 1 117 dona Haval avtomobillari ishlab chiqarilgan.
Izoh (0)