“Daryo”da Qashqadaryo viloyatining Shahrisabz shahridagi kafeda o‘zaro kelishmovchilik sabab fuqaro o‘qotar quroldan otilgani, voqea yuzasidan jinoyat ishi qo‘zg‘atilgani haqida xabar berilgandi. “Olamsport.com” ma’lumotiga ko‘ra, marhum To‘ra Avloqulov faxriylar o‘rtasidagi jahon chempionatining oltin medali sovrindori bo‘lgan.
Qotillik voqeasi 2024-yilning 29-mart kuni taxminan 19:30 da sodir bo‘lgan.
Bildirilishicha, ulfatlar kafeda spirtli ichimlik iste’mol qilib, mast holda bazm pulini to‘lash ustida tortishib qolgan.
SH.U. tanishi To‘ra Avloqulovga yo‘lda kelayotgan paytda 50 ming so‘m pul berganini, shu bois ovqatlanish xarajatini to‘liq to‘lashini aytgan. Sportchi esa unga hamma pulni to‘lamasligini bildirib, undan olgan 50 ming so‘m pulni qaytarib bergan. SH.U. pulni olmasdan unga “Pulni cho‘ntagingga solib qo‘y”, deya jahl qilib, avtomobilidagi temir quvurdan qo‘lbola usulda yasalgan qurolni olib, sherigining boshiga bir marta o‘q uzgan. Hamda voqea joyidan ketib qolgan. Natijada To‘ra Avloqulov olgan tan jarohati oqibatida Shahrisabz shahar tibbiyot birlashmasi shoshilinch tez tibbiy yordam bo‘limiga yotqizilgan, — deyiladi Bosh prokuratura axborot xizmati ma’lumotida.
Sportchi ko‘p o‘tmay, shifoxonada vafot etgan.
“Olamsport.com”ning yozishicha, marhum To‘ra Avloqulov 2023-yili Ostona shahrida o‘tkazilgan faxriylar o‘rtasidagi jahon chempionatida ishtirok etib, 55-59 yoshli sport ustalari o‘rtasidagi bahslarda oltin medalni qo‘lga kiritgan.
Mazkur holat yuzasidan Shahrisabz tuman prokuraturasi tomonidan fuqaroga nisbatan Jinoyat kodeksining 25,97-moddasi 2-qismi “d” va “l” bandlari (bezorilik oqibatida, boshqa shaxslarning hayoti uchun xavfli bo‘lgan usulda qasddan odam o‘ldirish) bilan jinoyat ishi qo‘zg‘atilib, Jinoyat-protsessual kodeksining 221-moddasi tartibida ushlangan. Tergov harakatlari olib borilmoqda.
Izoh (0)