Vazirlar Mahkamasining “Tog‘-kon va geologiya sanoati vazirligi huzuridagi Tog‘-kon va geologiya sohasini nazorat qilish inspeksiyasi faoliyatini tashkil etish chora-tadbirlari to‘g‘risida”gi qarori qabul qilindi.
Hujjat bilan quyidagilar tasdiqlandi:
- Tog‘-kon va geologiya sanoati vazirligi huzuridagi Tog‘-kon va geologiya sohasini nazorat qilish inspeksiyasi to‘g‘risidagi nizom;
- Tog‘-kon va geologiya sohasini nazorat qilish inspeksiyasining harbiylashtirilgan kon-qutqaruv qismi to‘g‘risidagi nizom.
Inspeksiya yer qa’ridan foydalanuvchilar (yuridik va jismoniy shaxslar) tomonidan yer qa’ridan foydalanish va uni muhofaza qilish sohasidagi qonunchilik va normativ hujjatlar talablariga geologik o‘rganish, foydali qazilmalarni (shu jumladan, yerosti suvlarini) qazib olish va mineral xomashyoni qayta ishlash jarayonida rioya qilinishi ustidan nazorat olib boradi.
Inspeksiyaning vazifalaridan biri — yer qa’ridan foydalanishda marksheyderlik o‘lchov ishlarining o‘z vaqtida o‘tkazilishi va qazib olingan (ajratilgan) foydali qazilmalarning ishonchli hisobi yuritilishi ustidan nazorat qilish. Bu nazorat 1984-yilgi Jahon geodezik tizimi (WGS-84) asosida amalga oshiriladi.
Marksheyderlik o‘lchovlari ma’lumotlari bo‘yicha amalda qazib olingan (ajratilgan) foydali qazilmalar hajmi to‘g‘risidagi hisobotlar yer qa’ridan foydalanuvchilar tomonidan quyidagi talablarga rioya qilgan holda taqdim etiladi:
- birlamchi hujjatlarning (hisob-fakturalar, o‘lchov vositalari ko‘rsatkichlari va boshqa zarur ma’lumotlar) elektron nusxalari axborot tizimidagi soliq to‘lovchining shaxsiy kabinetiga kiritiladi;
- shaxsiy kabinetga kiritilgan ma’lumotlar marksheyderlik tashkilotlari va xabardor qilish tartibida faoliyat yuritayotgan yer qa’ridan foydalanuvchilar tomonidan ERI bilan tasdiqlanadi;
- aniqlashtirilgan ma’lumotlar har chorak yakuni bo‘yicha keyingi oyning 20-sanasigacha Tog‘-kon va geologiya sanoati vazirligining “Yer qa’ridan foydalanish markazi” davlat muassasasi tomonidan yer qa’ridan foydalanuvchilarning shaxsiy kabinetlari orqali soliq organlariga avtomatik ravishda taqdim etiladi.
Bunda haqiqatda qazib olingan (ajratib olingan) foydali qazilmalar hajmi to‘g‘risidagi hisobotlarda aks ettiriladigan ma’lumotlarning haqqoniyligi tasdiqlanmagan taqdirda, yer qa’rida foydalanuvchilar bilan birga marksheyderlik o‘lchovlarini bajargan subyektlarga (tashkilotlarga) nisbatan hujjatlarda belgilangan javobgarlik choralari ko‘riladi.
O‘zbekistonda 2025-yilda tog‘-kon va geologiya sohasidagi loyihalarga 1 milliard dollar investitsiya jalb qilish ko‘zda tutilmoqda. Tog‘-kon sanoati elektrotexnika, qurilish materiallari, kimyo, zargarlik kabi tarmoqlar uchun xomashyoni ko‘paytirib, ularning o‘sishiga katta turtki beryapti.
Ma’lumotlarga ko‘ra, O‘zbekistonga so‘nggi 7 yilda kiritilgan 120 milliard dollar investitsiya hisobiga 6 mingdan ortiq korxona ishga tushdi. Jalb qilingan har 1 ming dollar investitsiya yiliga o‘rtacha 530 dollar qo‘shilgan qiymat yaratmoqda. Tog‘-kon sanoatida bu ko‘rsatkich 700 dollarga yetgani sababli sohaga Germaniya, Turkiya, Xitoy va boshqa davlatlardan investorlar kirib kelishni boshladi.
Bundan avval O‘zbekistonda sanoat, radiatsiya va yadro xavfsizligi bo‘yicha talablarni buzganlik uchun javobgarlik kuchaytirilishi haqida xabar berilgan edi.
Izoh (0)