Вазирлар Маҳкамасининг “Тоғ-кон ва геология саноати вазирлиги ҳузуридаги Тоғ-кон ва геология соҳасини назорат қилиш инспекцияси фаолиятини ташкил этиш чора-тадбирлари тўғрисида”ги қарори қабул қилинди.
Ҳужжат билан қуйидагилар тасдиқланди:
- Тоғ-кон ва геология саноати вазирлиги ҳузуридаги Тоғ-кон ва геология соҳасини назорат қилиш инспекцияси тўғрисидаги низом;
- Тоғ-кон ва геология соҳасини назорат қилиш инспекциясининг ҳарбийлаштирилган кон-қутқарув қисми тўғрисидаги низом.
Инспекция ер қаъридан фойдаланувчилар (юридик ва жисмоний шахслар) томонидан ер қаъридан фойдаланиш ва уни муҳофаза қилиш соҳасидаги қонунчилик ва норматив ҳужжатлар талабларига геологик ўрганиш, фойдали қазилмаларни (шу жумладан, ерости сувларини) қазиб олиш ва минерал хом ашёни қайта ишлаш жараёнида риоя қилиниши устидан назорат олиб боради.
Инспекциянинг вазифаларидан бири — ер қаъридан фойдаланишда маркшейдерлик ўлчов ишларининг ўз вақтида ўтказилиши ва қазиб олинган (ажратилган) фойдали қазилмаларнинг ишончли ҳисоби юритилиши устидан назорат қилиш. Бу назорат 1984 йилги Жаҳон геодезик тизими (WGS-84) асосида амалга оширилади.
Маркшейдерлик ўлчовлари маълумотлари бўйича амалда қазиб олинган (ажратилган) фойдали қазилмалар ҳажми тўғрисидаги ҳисоботлар ер қаъридан фойдаланувчилар томонидан қуйидаги талабларга риоя қилган ҳолда тақдим этилади:
- бирламчи ҳужжатларнинг (ҳисоб-фактуралар, ўлчов воситалари кўрсаткичлари ва бошқа зарур маълумотлар) электрон нусхалари ахборот тизимидаги солиқ тўловчининг шахсий кабинетига киритилади;
- шахсий кабинетга киритилган маълумотлар маркшейдерлик ташкилотлари ва хабардор қилиш тартибида фаолият юритаётган ер қаъридан фойдаланувчилар томонидан ERI билан тасдиқланади;
- аниқлаштирилган маълумотлар ҳар чорак якуни бўйича кейинги ойнинг 20-санасигача Тоғ-кон ва геология саноати вазирлигининг “Ер қаъридан фойдаланиш маркази” давлат муассасаси томонидан ер қаъридан фойдаланувчиларнинг шахсий кабинетлари орқали солиқ органларига автоматик равишда тақдим этилади.
Бунда ҳақиқатда қазиб олинган (ажратиб олинган) фойдали қазилмалар ҳажми тўғрисидаги ҳисоботларда акс эттириладиган маълумотларнинг ҳаққонийлиги тасдиқланмаган тақдирда, ер қаърида фойдаланувчилар билан бирга маркшейдерлик ўлчовларини бажарган субъектларга (ташкилотларга) нисбатан ҳужжатларда белгиланган жавобгарлик чоралари кўрилади.
Ўзбекистонда 2025 йилда тоғ-кон ва геология соҳасидаги лойиҳаларга 1 миллиард доллар инвестиция жалб қилиш кўзда тутилмоқда. Тоғ-кон саноати электротехника, қурилиш материаллари, кимё, заргарлик каби тармоқлар учун хом ашёни кўпайтириб, уларнинг ўсишига катта туртки беряпти.
Маълумотларга кўра, Ўзбекистонга сўнгги 7 йилда киритилган 120 миллиард доллар инвестиция ҳисобига 6 мингдан ортиқ корхона ишга тушди. Жалб қилинган ҳар 1 минг доллар инвестиция йилига ўртача 530 доллар қўшилган қиймат яратмоқда. Тоғ-кон саноатида бу кўрсаткич 700 долларга етгани сабабли соҳага Германия, Туркия, Хитой ва бошқа давлатлардан инвесторлар кириб келишни бошлади.
Бундан аввал Ўзбекистонда саноат, радиация ва ядро хавфсизлиги бўйича талабларни бузганлик учун жавобгарлик кучайтирилиши ҳақида хабар берилган эди.
Изоҳ (0)