Jizzaxda ichida yo‘lovchilar bo‘lgan avtobus yuk mashinasiga urildi. Qurbonlar bor

Jizzax viloyatining Sharof Rashidov tumanida ichida yo‘lovchilari bo‘lgan avtobus yuk mashinasiga urilishi oqibatida ikki kishi vafot etdi.

Viloyat IIB matbuot xizmatining ma’lum qilishicha, YTH “So‘loqli” mahallasi hududidan o‘tgan Toshkent—Termiz M-39 yo‘lining 998-kilometrida Yutong avtobusi Howo rusumli yuk mashinasi orqasidan urilgan.

Oqibatda Qoraqalpog‘iston Respublikasining Xo‘jayli hamda Mo‘ynoq tumanlarida yashovchi ikki nafar fuqaro olgan tan jarohatlari tufayli vafot etgan. 

Shuningdek, Qoraqalpog‘istonning Nukus shahri va Taxiatosh tumanida yashovchi uch kishi hamda bir nafar fransiyalik fuqaro turli darajada jarohatlar olgan.

Ayni paytda tibbiy yordamga muhtojlarga tegishli muolajalar ko‘rsatilmoqda. Avtobusning boshqa yo‘lovchilarini manzillariga yetkazish choralari ko‘rilyapti.