Surxondaryo viloyati hokimi Ulug‘bek Qosimov boshchiligidagi delegatsiya aʼzolari Vengriya davlatida bo‘lib, yetakchi kompaniyalar bilan ikki tomonlama muzokaralar o‘tkazdi, deb xabar beradi O‘zA.
O‘zbekistonning Vengriyadagi elchixonasi ko‘magida tashkil etilgan safar chog‘ida Denov tumanidagi “Denov Oltin Don” masʼuliyati cheklangan jamiyati Avstriyaning Doppelmayr kompaniyasi bilan qiymati 20 million yevro bo‘lgan osma dor yo‘li loyihasini amalga oshirish bo‘yicha shartnoma imzolagan.
Yangi loyiha Sariosiyo tumanidagi xushmanzara tog‘lar qo‘ynida joylashgan mashhur Sangardak qishlog‘ida bunyod etiladi. “Turizm qishlog‘i” maqomiga ega Sangardak go‘zal tabiat manzaralari, noyob va betakror sharsharasi bilan dunyoga tanilgan. 2023-yili hududdagi maftunkor tabiat qo‘ynida zamonaviy sanatoriy ham qurilgandi.
Loyiha doirasida daraning tepasidan tog‘ va so‘lim qishloqni tomosha qilish uchun maxsus maydon, tomosha maydoniga chiqish uchun yo‘lak va zinalar, kirish qismiga stella va yengil konstruksiyali mehmon uylari quriladi. Restoran, ot va tuyada sayr qilish, mini sport maydonchalari, oilaviy piknik va maxsus selfi zonalari, o‘yin va raqs maydonchalari barpo etiladi.
.jpg)
Yevropalik hamkorlarimiz bilan loyihani ishga tushirishning barcha taraflarini kelishib oldik. Yaqin kunlarda ishlar boshlanadi. Uni shu yil foydalanishga topshirib, purviqor tog‘lar bag‘ridagi Sangardakning yanada serqatnov turistik maskanga aylanishiga munosib hissa qo‘shamiz, – deydi “Denov Oltin Don” masʼuliyati cheklangan jamiyati rahbari P. Mirzayev.
Daradagi tog‘larni birlashtiruvchi osma dor yo‘lining uzunligi 1 ming 200 metrni tashkil etadi.
Eslatib o‘tamiz, 2023-yil iyul oyida Namangan viloyati Pop tumanida ichida fuqarolar bo‘lgan “kanatniy doroga” ishlamay to‘xtab qolgandi. Fuqarolar dor yo‘lidan kanat ishchi xodimlari tomonidan qutqaruv arqoni orqali tushirib olingan.
Izoh (0)