Sergelidagi chang, o‘ydim-chuqur yo‘llar aholi noroziligiga sabab bo‘lmoqda. Mas’ullar esa va’dasini unutdi (foto)

Toshkent shahrining Sergeli tumani Sug‘diyona ko‘chasidagi abgor holat aholi noroziliga sabab bo‘lmoqda. Bu haqda “Daryo”ga bildirgan murojaatchilarga ko‘ra, yo‘llarning buzib tashlangani ularga noqulaylik tug‘dirmoqda. 

Ertalab ishga ketguncha bir necha mashinalar ketma-ket yura boshlasa, chang-to‘zon ko‘tariladi. Asfaltning kesib tashlangani mashinalarning yurishiga noqulaylik tug‘diradi, deydi murojaatchilardan biri. 

Yana bir murojaatchiga ko‘ra, ko‘cha kabel o‘tkazish ishlari bajarilayotgan paytda shunday kavlab tashlangan va shu holatida tashlab ketilgan. 

Mayli, kabel o‘tkazishibdi. Lekin nega kavlab tashlangan yo‘llar tuzatilib, o‘z holiga qaytarib qo‘yilmagan? Kabel o‘tkazish ishlari bajarilsa, bo‘ldimi? Odamlarga noqulaylik tug‘dirishi ikkinchi darajali masalami?, deydi u. 

Sergeli tumani hokimligi axborot xizmatining “Daryo”ga bildirishicha, Sug‘diyona ko‘chasining bunday holatga kelishiga hududda 10 kVt yuqori kuchlanishli kabel yangilanishi bilan bog‘liq. 

Elektr ta’minoti korxonasi o‘zi kavlagan hududlarini o‘zi asfalt qilib, obodonlashtiradi. Qolgani tuman hokimligi tomonidan mablag‘ ajratilgandan so‘ng amalga oshiriladi, deyiladi hokimlik axborot xizmatining mas’ullarga tayanib bergan axborotida.

Murojaaatchilarning aytishicha, Sergeli tumani hokimi Elbek Shukurov Zarunar 2-tor ko‘chasi bilan tutash hududni ham asfalt qilishni va’da qilgan. Biroq, hokim va’dasini to‘liq bajarmagan. Ushbu ko‘chaga olib kiruvchi yo‘lning faqat kirish qismi hisobot uchun asfalt qilinib, qolgan qismi qolib ketgan. 

Mashinalardan chiqadigan changni hidlab bu ko‘chadan har kuni o‘nlab yosh bolalar yuradi, changning inson salomatligiga ta’sirini esa gapirmasa ham bo‘ladi, — deydi murojaatchilardan biri.

Hokimlik mas’ullariga ko‘ra, mazkur ko‘chadagi asfalt kesilmagan. Yo‘l chetidan kovlangan.

Faqat bir-ikkita joyda kavlangan yer bor. Keyingi haftada (avgust oyining 27-28 sanalari nazarda turilmoqda. Tahririyat izohi) asfalt qilinadi. Qolgan joyi bugun-erta (20-21-avgust nazarda tutilmoqda) yopadi, degandi mas’ullar. Biroq, va’da bajarilmadi.