Indoneziya hukumati G‘azodagi urushdan jabrlangan 2 ming nafarga yaqin fuqaroni davolash uchun mamlakat hududidagi bo‘sh turgan Galang orolida tibbiy markaz ochishini ma’lum qildi. Bu haqda 7-avgust kuni prezident matbuot kotibi Hasan Nasbi Jakarta shahrida jurnalistlarga ma’lum qildi.
“Biz urush qurboni bo‘lgan va tan jarohati olgan G‘azo aholisi uchun tibbiy yordam ko‘rsatamiz”, dedi matbuot kotibi.
Ma’lum qilinishicha, davolash ishlari Sumatra yaqinidagi Galang orolida bo‘lib o‘tadi. Mazkur orolda ilgari Vyetnam urushidan qochganlar uchun BMT tomonidan boshqarilgan qochoqlar lageri faoliyat ko‘rsatgan. Hozirda orolda birorta aholi yashamaydi.
Indoneziya hukumati shuningdek, bu jarayonda yaradorlarning oila a’zolariga ham vaqtincha boshpana berilishini bildirgan. Bemorlar sog‘lig‘i tiklangach, ularning G‘azoga qaytarilishi rejalashtirilmoqda, biroq bu bo‘yicha aniq sana yoki mexanizm hali e’lon qilinmagan.
E’tirozlar va xavotirlar: “Bu Isroil rejasi emasmi?”
Indoneziya musulmon jamoatchiligi orasida bu qaror keskin munozaralarga sabab bo‘lmoqda. Mamlakat ulamolar kengashi rais o‘rinbosari Buya Anvar Abbos bu tashabbusni tanqid qilar ekan, shunday dedi:
“Indoneziya Isroil hiylalariga aldanmasligi kerak. G‘azo aholisi aynan o‘z yurtida davolanishi kerak”.
Shuningdek, u Indoneziya tarixan 350 yil mustamlaka ostida bo‘lgan davlat sifatida, har qanday “shirin gaplar” ortidagi niyatni chuqur tahlil qilish zarurligini ta’kidladi. Yana bir yirik diniy tashkilot — Nahdlatul Ulama yetakchisi Rais Syuriah esa shifoxona tashkil etish qaroriga shunday munosabat bildirdi:
“Bu insonlar G‘azo hududiga qayta oladimi? Qanchadan qancha falastinliklar hali hanuz vatanga qaytolmayapti. Bu reja, aksincha, Isroilga yana yer egallashni osonlashtirib qo‘ymaydimi?”.
Rasmiylarning munosabati
Avvalroq Axios nashri Isroil razvedka xizmati “Mossad” AQSH yordamida Indoneziya, Liviya va Efiopiyaga G‘azodan ko‘plab falastinliklarni ko‘chirish bo‘yicha muzokara olib borganini xabar qilgandi. Biroq bu xabarni Indoneziya Tashqi ishlar vazirligi rad etib, hech qachon bunday rejani muhokama qilmaganini bildirgan. Vazirlik Yaqin Sharq inqiroziga yechim sifatida ikki davlat (Falastin va Isroil) tamoyilini qo‘llab-quvvatlashini, va falastinliklarni majburan ko‘chirishga qat’iy qarshi ekanini ta’kidlagan.
Ma’lumot uchun, Galang orolida 2020-yilda COVID-19 pandemiyasi vaqtida davolash uchun vaqtincha kasalxona ochilgan. Bu orol 1996-yilgacha BMT boshchiligida faoliyat yuritgan qochqinlar lageriga mezbonlik qilgan bo‘lib, Vyetnam urushidan qochgan 250 ming nafarga yaqin odam shu yerda vaqtincha yashagan.
Izoh (0)