Bir qancha Yevropa davlatlari 2025-yil yoz mavsumida sayyohlar uchun keskin jarimalar qo‘llashga qaror qildi. Endilikda plyajdan tashqarida cho‘milish kiyimida yurish, jamoat joyida spirtli ichimlik iste’mol qilish yoki shunchaki kanalga sakrash sayyohlarga qimmatga tushishi mumkin.
Ma’lum qilinishicha, keskin jarimalar “madaniyatsiz” ravishda o‘zini tutgan sayyohlar uchun joriy etiladi. Endilikda turli shahar va kurort zonalarda mayda qoidabuzarliklar sayohatchilar “cho‘ntagini quritishi” mumkin. Quyida turli davlatlarda o‘rnatilayotgan ba’zi jarimalar keltirilgan:
- Ispaniyaning Malorka va Ibiza orollarida omma oldida spirtli ichimlik ichganlar 3 ming yevrogacha jarima to‘laydi.
- Portugaliyaning Albufeira shahrida plyajdan tashqarida cho‘milish kiyimida yurish 1 500 yevrogacha tushishi mumkin.
- Italiyaning Cinque Terre hududida tog‘ yo‘llarida noqulay poyabzalda, ya’ni shippakda yurish 2 500 yevrogacha jarimaga olib keladi.
- Gretsiyada dengizdan bir dona chig‘anoq yoki tosh olib chiqqanlik uchun 1 000 yevro to‘lanadi.
- Venetsiyada kanalda cho‘milganlik uchun 350 yevro jarima solinadi.
- Fransiyada jamoat plyajlarida va o‘yin maydonchalarida tamaki chekkanlar 90 yevro to‘laydi.
Kundalik holatlar ham nazorat ostida
- Shippak kiyish, yalangoyoq yoki ochiq oyoq kiyimda mashina haydash 300 yevrogacha jarimaga sabab bo‘ladi (Ispaniya, Italiya, Gretsiya, Fransiya, Portugaliya);
- Cho‘milish kiyimida ko‘chada yurganlar 1 500 yevrogacha tovon to‘laydi (Barselona, Split, Sorrento, Venetsiya va boshqalar).
Mahalliy hokimiyat nima deydi?
Ispaniyaning Malorka orolida joylashgan Kalviya shahri meri Xuan Antonio Amengual jarima solinishiga shunday munosabat bildirdi:
“Turizm fuqarolarga og‘irlik qilmasligi kerak. Biz tabiatni asrash va turizmni jamiyat bilan uyg‘unlashtirishni ko‘zlayapmiz”.
Mutasaddilarga ko‘ra, bu qoidalar sayyohlar oqimi ko‘paygan davrda tartib-intizomni saqlash, mahalliy aholining osoyishtaligini ta’minlash va mas’uliyatli sayohat madaniyatini shakllantirishga qaratilgan.
Izoh (0)