AQSH Ukrainaga xavfsizlik kafolatlarini taqdim etish doirasida u yerda qo‘shin joylashtirishni rejalashtirmayapti. Bu haqda Oq uy matbuot kotibi Kerolin Livitt ma’lum qildi.
“Prezident AQSH harbiy xizmatchilarining Ukraina hududida bo‘lmasligi haqida aniq fikr bildirdi. Biroq, biz, shubhasiz, Yevropadagi ittifoqchilarimiz bilan muvofiqlashtirish ishlarida yordam berishimiz va ehtimol, xavfsizlikni ta’minlashning boshqa choralarini taklif etishimiz mumkin”, dedi u jurnalistlar uchun doimiy brifingda.
Shu bilan birga, u Vashington xavfsizlik kafolati sifatida Ukrainani havo orqali qo‘llab-quvvatlash imkoniyatini rad etmasligini ta’kidlagan.
“Prezident mustahkam tinchlik o‘rnatish uchun xavfsizlik kafolatlari juda muhimligini anglab yetdi va milliy xavfsizlik bo‘yicha jamoasiga yevropalik hamkorlarimiz bilan harakatlarni muvofiqlashtirish, shuningdek, Ukraina va Rossiya bilan hamkorlikni davom ettirish hamda bu masalalarni muhokama qilish bo‘yicha ko‘rsatma berdi. Bu variantlardan va imkoniyatlardan biridir. Men, albatta, prezident ixtiyorida bo‘lgan harbiy variantlar borasida hech narsani istisno qilmagan bo‘lardim”, dedi Livitt.
Bundan avval AQSH prezidenti Donald Tramp Qrimni Ukrainaga qaytarishning iloji yo‘qligini aytdi. U mamlakatning NATOga qo‘shilish ehtimolini ham inkor etgandi.
18-avgust kuni kechqurun Tramp Zelenskiy va Yevropa yetakchilari bilan muzokaralar o‘tkazdi. Ochiq qism yarim soatdan sal kamroq davom etdi. Muzokaralarda NATO bosh kotibi Mark Ryutte, Yevrokomissiya rahbari Ursula fon der Lyayen, Buyuk Britaniya bosh vaziri Kir Starmer, Fransiya prezidenti Emmanuel Makron, Germaniya kansleri Fridrix Merts, Finlyandiya prezidenti Aleksandr Stubb, Italiya bosh vaziri Jorj Meloni ishtirok etdi.
Trampning o‘zi uchrashuvni “juda samarali” deb atadi. Uning so‘zlariga ko‘ra, tomonlar AQSH bilan kelishilgan holda Yevropaning turli davlatlari tomonidan taqdim etiladigan Ukraina uchun xavfsizlik kafolatlarini muhokama qilgan.
Izoh (0)