Norvegiyada oyog‘i singan holda muzlikda besh kun qolib ketgan amerikalik mashhur jurnalist-ekolog qutqarib olindi. Bu haqda The Guardian xabar bermoqda.
Ma’lum qilinishicha, New York Times va Atlantic nashrlarida ishlagan, shuningdek, The Guardian gazetasining maxsus muxbiri bo‘lgan 38 yoshli jurnalist Alek Lun singlisi bilan Norvegiyada dam olayotgan bo‘lgan.
31-iyul kuni amerikalik to‘rt kunlik yolg‘iz sayohatga chiqqan, so‘ngra mamlakatdagi eng yirik muzliklardan biri joylashgan chekka Folgefonna milliy bog‘ida bedarak yo‘qolgan.
Uning qarindoshlari erkakning yo‘qolganini 4-avgust, dushanba kuni, u Bergendan Buyuk Britaniyaga uchib ketmaganidan so‘ng bilishgan. Qutqaruvchilar Lunni 6-avgust, chorshanba kuni tushdan keyin topishgan. Uni qidirishda Qizil Xoch ko‘ngillilari, politsiya, itlar, maxsus alpinistlar guruhlari va dronlar ishtirok etgan.
Lun jiddiy jarohat olgan va “juda yomon ob-havoda, deyarli ovqat va ichimliklarsiz tog‘da besh kun o‘tkazgan”. Qutqaruv operatsiyasi ishtirokchilarining ta’kidlashicha, jurnalistning “juda omadi kelgan”, chunki ular shu kungacha yo‘qolgan sayyohlarni tirik topmagan.
Uning topilgani va vertolyotda Bergen shahriga olib ketilganini singlisi ijtimoiy tarmoqlarda tasdiqlagan.
Ma’lum qilinishicha, Lun ko‘plab mukofotlar sohibi bo‘lib, ikki marta “Emmi” mukofotiga nomzod bo‘lgan. U uzoq vaqt davomida Moskva va Istanbulda yashagan. Hozirda Buyuk Britaniyada istiqomat qiladi va Pulitser okeanografik tadqiqotlar markazining stipendiati sifatida iqlim jurnalistikasi bilan shug‘ullanadi.
Izoh (0)