Норвегияда оёғи синган ҳолда музликда беш кун қолиб кетган америкалик машҳур журналист-эколог қутқариб олинди. Бу ҳақда The Guardian хабар бермоқда.
Маълум қилинишича, New York Times ва Atlantic нашрларида ишлаган, шунингдек, The Guardian газетасининг махсус мухбири бўлган 38 ёшли журналист Алек Лун синглиси билан Норвегияда дам олаётган бўлган.
31 июль куни америкалик тўрт кунлик ёлғиз саёҳатга чиққан, сўнгра мамлакатдаги энг йирик музликлардан бири жойлашган чекка Фолгефонна миллий боғида бедарак йўқолган.
Унинг қариндошлари эркакнинг йўқолганини 4 август, душанба куни, у Бергендан Буюк Британияга учиб кетмаганидан сўнг билишган. Қутқарувчилар Лунни 6 август, чоршанба куни тушдан кейин топишган. Уни қидиришда Қизил Хоч кўнгиллилари, полиция, итлар, махсус алпинистлар гуруҳлари ва дронлар иштирок этган.
Лун жиддий жароҳат олган ва “жуда ёмон об-ҳавода, деярли овқат ва ичимликларсиз тоғда беш кун ўтказган”. Қутқарув операцияси иштирокчиларининг таъкидлашича, журналистнинг “жуда омади келган”, чунки улар шу кунгача йўқолган сайёҳларни тирик топмаган.
Унинг топилгани ва вертолётда Берген шаҳрига олиб кетилганини синглиси ижтимоий тармоқларда тасдиқлаган.
Маълум қилинишича, Лун кўплаб мукофотлар соҳиби бўлиб, икки марта “Эмми” мукофотига номзод бўлган. У узоқ вақт давомида Москва ва Истанбулда яшаган. Ҳозирда Буюк Британияда истиқомат қилади ва Пулитцер океанографик тадқиқотлар марказининг стипендиати сифатида иқлим журналистикаси билан шуғулланади.
Изоҳ (0)